रम्याविरोधात देशद्रोहाचा खटला

मटा ऑनलाइन वृत्त । बेंगळुरू

'पाकिस्तान म्हणजे नरक नाही', असे विधान करणारी कन्नड अभिनेत्री आणि काँग्रेस नेता रम्याविरोधात येथील मॅजिस्ट्रेट कोर्टात देशद्रोहाचा खटला दाखल करण्यात आला आहे. रम्याने अशाप्रकारे पाकिस्तानची स्तुती केल्याने भारताचा अपमान झाला आहे, असा याचिकाकर्त्याचा आरोप आहे.

इस्लामाबादमध्ये झालेल्या सार्क युवा खासदार संमेलनात सहभागी झालेल्या रम्याने भारतात परतल्यानंतर पाकिस्तानची स्तुती करताना संरक्षण मंत्री मनोहर पर्रीकर यांच्या विधानाला आक्षेप घेतला होता. 'पाकिस्तानात जाणं म्हणजे नरकात जाण्यासारखंच आहे', या पर्रीकर यांच्या विधानात तथ्य नसल्याचे रम्या म्हणाली होती. 'पाकिस्तानची नरकाशी तुलना करणे चुकीचे आहे. पाकिस्तान आपल्या देशासारखाच देश आहे. तेथील लोक आणि आपल्यात काहीच फरक नाही. तिथे आम्हाला फार चांगली वागणूक मिळाली', असे वक्तव्य रम्याने केले होते. रम्याच्या या वक्तव्यावरून सोशल मीडियातून गेल्या काही दिवसांपासून तीव्र प्रतिक्रिया उमटत आहे.

अखिल भारतीय विद्यार्थी परिषद आणि भाजपने रम्या देशद्रोही आहे, असे म्हणत तिच्याविरोधात कर्नाटकमध्ये अनेक भागात निदर्शनं केली. रम्याने माफी मागावी वा देश सोडून निघून जावे, अशी मागणी भाजपकडून करण्यात आली. त्यातच आता के. विठ्ठल गौडा नामक वकिलाने रम्याविरोधात सोमवारपेठ कोर्टात देशद्रोहाचा खटला दाखल केला आहे. रम्याच्या वक्तव्याने भारतीयांच्या भावना दुखावल्या आहेत. भारताचा अपमान झाला आहे, असा आरोप गौडा यांनी याचिकेत केला आहे.

दरम्यान, रम्या मात्र अपल्या विधानावर ठाम असून माफी मागण्यास तिने स्पष्ट शब्दांत नकार दिला आहे.