काँग्रेसचा भाजपवर पलटवार

मटा ऑनलाइन वृत्त । नवी दिल्ली

रॉबर्ट वड्राच्या विरोधात असलेल्या आरोपांची चौकशी भाजप सरकारने का केली नाही असा खडा सवालच काँग्रेसने आज उपस्थित केला. मागील ४१ महिन्यांत वड्रा यांच्याविरोधात एकही आरोप सिद्ध होऊ शकला नसून भाजप सरकार सूडबुद्धीने वागत असल्याची टीका काँग्रेस प्रवक्ते अभिषेक मनू सिंघवी यांनी केली.

फरार असलेला शस्त्रास्त्र व्यापारी संजय भंडारी याने रॉबर्ट वड्रांसाठी विमानाचे तिकीट बुक केले असल्याची माहिती समोर आल्यानंतर भाजपने काँग्रेसवर निशाणा साधला होता. त्याला आज काँग्रेस प्रवक्ते अभिषेक मनू सिंघवी यांनी पत्रकार परिषद घेत भाजपला प्रत्युत्तर दिले. भाजपच्या नेतृत्वातील केंद्र सरकार, राज्य सरकारने मागील ४१ महिन्यांपासून काँग्रेस अध्यक्ष सोनिया गांधी यांचे जावई रॉबर्ट वड्रांविरोधात असलेल्या आरोपांचा तपास थांबवला आहे. सरकार अडचणीत आल्यानंतर लोकांचे लक्ष विचलित करण्यासाठी हेच आरोप पुन्हा केले जात असल्याचे सिंघवी यांनी म्हटले. शस्त्रास्त्र व्यापारी संजय भंडारीवर एप्रिल २०१६ मध्ये छापा टाकण्यात आला होता. त्यानंतर जून २०१६ मध्ये त्याचा पासपोर्टही जप्त करण्यात आला होता. डिसेंबर २०१६ मध्ये संजय भंडारी फरार झाला. त्याची माहितीही सरकारला नसल्याचे सिंघवी यांनी सांगत भाजपवरच प्रश्न उपस्थित केला.

काँग्रेसने पंतप्रधान नरेंद्र मोदींवरही निशाणा साधला. गुजरातचे मुख्यमंत्री असताना नरेंद्र मोदी यांनी २००३ ते २००७ या वर्षांमध्ये खासगी विमाने, हेलिकॉप्टरद्वारे १०० वेळा प्रवास केला असून यासाठी १६.५६ कोटी रुपयांचा खर्च आला होता. यामध्ये चार परदेशी दौऱ्यांचा समावेश होता. यामध्ये मोदींसह काही खासगी कंपन्यांचे अधिकारीसोबत असल्याचे सिंघवी यांनी म्हटले. हे प्रकरण २००७ साली उघडकीस आल्यानंतरदेखील कोणतीच कारवाई झाली नसल्याकडे काँग्रेसने लक्ष वेधले.