NDTV नंतर 'न्यूज टाइम आसाम'वरही बंदी

मटा ऑनलाइन वृत्त । नवी दिल्ली

एनडीटीव्ही इंडिया वाहिनीवर एक दिवसाची बंदी घातल्यानंतर आता सरकारने 'न्यूज टाइम आसाम'वरही एक दिवसाच्या बंदीचा आदेश लागू केला आहे.

पीटीआयने दिलेल्या वृत्तानुसार, नियमांचे उल्लंघन केल्याने 'न्यूज टाइम आसाम' ही वाहिनी एक दिवस ऑफ एअर राहील. केबल टीव्ही नेटवर्क अधिनियमानुसार माहिती आणि प्रसारण मंत्रालयाने एनडीटीव्हीचे प्रसारण रोखण्याचा आदेश जारी करताना म्हटले आहे की, 'भारतात कोणत्याही माध्यमाद्वारे एनडीटीव्ही इंडियाचे प्रसारण तसेच पुनःप्रसारण रोखण्यात येत आहे. ९ नोव्हेंबर २०१६ रोजी रात्री १२ वाजून १ मिनिटांपासून ते १० नोव्हेंबर २०१६ रोजी १२ वाजून १ मिनिटांपर्यंत प्रसारण बंद राहील.' वृत्तवाहिनीवर अशाप्रकारे बंदीच्या आदेशामुळे सरकारवर सर्वत्र टीका होत आहे.