ड्रायविंग लायसन्स आधारशी जोडावे लागणार

मटा ऑनलाइन वृत्त । नवी दिल्ली

मोबाईल नंबर आणि पॅन कार्ड आधारशी लिंक करणं बंधनकारक केल्यानंतर केंद्र सरकारने आता ड्रायविंग लायसन्सकडे मोर्चा वळवला आहे. लवकरच ड्रायविंग लायसन्स आधारशी जोडावे लागणार असल्याचे संकेत केंद्रीय मंत्री रवीशंकर प्रसाद यांनी दिले आहेत.

ड्रायविंग लायसन्स आधारशी जोडायचा विचार सुरू असून यासंबंधी आपण केंद्रीय परिवहन मंत्री नितीन गडकरी यांच्यासोबत चर्चा केली असल्याची माहिती रवीशंकर प्रसाद यांनी शुक्रवारी दिली. मनी लॉन्ड्रिंग रोखण्यासाठी पॅन कार्डला आधारशी जोडले आहे. जर ड्रायविंग लायसन्स आधारशी जोडले गेले तर बनावट ड्रायविंग लायसन्सला आळा बसू शकेल, तसेच दारू पिऊन गाडी चालवण्यासाठी बोगस लायसन्स काढणाऱ्यालाही पायबंद बसेल, असा दावा रवीशंकर प्रसाद यांनी यावेळी केला.

मोबाईल, पॅनकार्ड आधारशी लिंक करणं बंधनकारक

केंद्र सरकारने मोबाईल नंबर आणि पॅनकार्ड नंबर आधारशी जोडणं बंधनकारक केलयं. पॅनकार्ड आधारशी लिंक केलं नाही तर आयटी रिटर्न फाईल भरायला अडचणी येतात. तसेच मोबाईल नंबर फेब्रुवारीपर्यंत आधारशी जोडला नाही तर मोबाईल नंबर बंद होऊ होणार आहे.