चेन्नई : 'संपूर्ण देशभरात हिंदी वापरण्यात यावी, ही संकल्पना शक्य होणार नाही. दक्षिण भारतातील राज्यांमधूनच हिंदीच्या सक्तीला विरोध होईल असे नाही. उत्तर भारतातील काही राज्यांमधूनही विरोध होण्याची शक्यता नाकारता येत नाही,' अशा शब्दांत प्रसिद्ध अभिनेते रजनीकांत यांनी अमित शहा यांच्या हिंदीबाबत 'संकल्पनेला' विरोध दर्शवला. 'संपूर्ण देशासाठी एक भाषा असणे ही गोष्ट देशाच्या ऐक्याच्या दृष्टीने योग्य आहे. मात्र, दुर्दैवाने आपल्या देशात एकच भाषा बोलायची सक्ती करणे ही गोष्ट रास्त ठरणारी नाही', असे रजनीकांत म्हणाले. सन २०२१मध्ये राजकारणात उतरणार असल्याचे सूतोवाचही त्यांनी केले.
द्रमुकचा निषेध मोर्चा लांबणीवर
हिंदीबाबत अमित शहा यांनी स्पष्टीकरण दिल्याने कथित हिंदी सक्तीविरोधात शुक्रवारी आयोजित केलेला निषेध मोर्चा द्रमुकने लांबणीवर टाकला आहे. पक्षाचे अध्यक्ष एम. के. स्टालिन यांनी बुधवारी हे जाहीर केले. 'आपल्या विधानाचा विपर्यास केला गेला असा खुलासा शहा यांनी केल्याने द्रमुक आपले आंदोलन सध्या मागे घेत आहे. मात्र, पुन्हा हिंदीची सक्ती करण्याचा प्रयत्न झाल्यास कडाडून विरोध केला जाईल', असे स्टॅलिन म्हणाले.
\R