खासगी क्षेत्रात आरक्षणाला नीती आयोगाचा विरोध

मटा ऑनलाइन वृत्त । नवी दिल्ली

नोकऱ्यांमधील आरक्षणाच्या चर्चेत उडी घेत नीती आयोगाचे उपाध्यक्ष राजीव कुमार यांनी खासगी क्षेत्रात नोकऱ्यांच्या आरक्षणाला विरोध केला आहे. तसंच रोजगार वाढीसाठी अधिक प्रयत्न करण्याची गरज त्यांनी व्यक्त केली आहे.

खासगी क्षेत्रात नोकऱ्यांमध्ये आरक्षण नको. या पेक्षा जास्तीत जास्त रोजगार निर्मितीवर भर दिला पाहिजे. १० ते १२ लाख तरुणांना रोजगार देण्याची सरकारची क्षमता आहे. तसंच दरवर्षी देशात ६० लाख तरुण लेबर फोर्समध्ये येतात. सध्या अनेक जण असंगठीत क्षेत्रात नोकऱ्या शोधत आहेत. पण तिथे आता नोकऱ्यांची कमतरता आहे. यामुळे खासगी क्षेत्रात नोकऱ्यांमध्ये आरक्षण देण्याची चर्चा होऊ लागली आहे, असं राजीव कुमार म्हणाले.

लोक जनशक्ती पार्टीचे अध्यक्ष रामविलास पासवान यांनी अलिकडेच खासगी क्षेत्रात नोकऱ्यांमध्ये आरक्षणाची मागणी केली होती. अशीच मागणी इतर राजकीय पक्षांनीही केली होती. खासगी क्षेत्रात आरक्षणाची वेळ आली आहे, असं कर्नाटकचे मुख्यमंत्री सिद्धारामय्या म्हणाले होते. तर बिहारचे मुख्यमंत्री आणि जेडीयूचे अध्यक्ष नितीशकुमार यांनीही हाच मुद्दा उचलला होता. आर्थिक उदारीकरणात खासगी क्षेत्रात आरक्षण दिले गेले नाही तर सामाजिक न्यायाच्या सिद्धांताची खिल्ली उडवल्यासारखे होईल, असं नितीशकुमार म्हणाले होते.