नवी दिल्ली : अतिमहत्त्वाच्या व्यक्तींसाठी ऑगस्टा वेस्टलँड या कंपनीकडून हेलिकॉप्टर खरेदी करताना झालेल्या गैरव्यवहारप्रकरणी अटक करण्यात आलेल्या दुबईस्थित व्यावसायिक राजीव सक्सेनाची दिल्ली उच्च न्यायालयाने गुरुवारी चार दिवसांच्या अंमलबजावणी संचालनालयाच्या (ईडी) कोठडीत रवानगी केली.
हेलिकॉप्टर खरेदीचे कंत्राट ऑगस्टा वेस्टलँडला मिळावे यासाठी राजकीय नेते, सरकारी अधिकारी व हवाई दलातील अधिकाऱ्यांना पैसे पुरवण्यात सक्सेनाने सहकार्य केल्याचा आरोप आहे. त्याला बुधवारी सकाळी दुबईत अटक करण्यात आली होती व सायंकाळी त्याला भारतात पाठवण्यात आले. सखोल चौकशीसाठी त्याच्या आठ दिवसांच्या कोठडीची मागणी 'ईडी'तर्फे विशेष न्यायमूर्ती अरविंद कुमार यांच्या न्यायालयात करण्यात आली होती. मात्र सुनावणीदरम्यान सक्सेनाच्या वकिलांनी त्याला कॅन्सर असल्याने कोठडी न देण्याबाबत विनंती केली. परंतु याप्रकरणी त्याची चौकशी करणे अत्यावश्यक असल्याचे म्हणणे 'ईडी'तर्फे मांडण्यात आल्यानंतर न्यायाधीशांनी त्याला चार दिवसांची कोठडी सुनावली.