वृत्तसंस्था, श्रीहरिकोटा
हवाई दलाची संपर्कयंत्रणा प्रबळ करणाऱ्या 'जीसॅट ७ए' या उपग्रहाचे भारतीय अंतराळ संशोधन संस्थेने (इस्रो) बुधवारी यशस्वी प्रक्षेपण केले. आठ वर्षांचे आयुष्य असलेल्या या उपग्रहाद्वारे हवाई दलास केयू बँड पद्धतीच्या संपर्क यंत्रणेचा वापर करणे शक्य होणार आहे.
२२५० किलो वजनाच्या या उपग्रहाने दुपारी ४ वाजून १० मिनिटांनी आकाशात झेप घेतली. प्रक्षेपणानंतर १९ मिनिटांनी तो निर्धारित कक्षेत स्थिरावला. येत्या काही दिवसांत प्रक्षेपकापासून उपग्रह विलग होईल व आपल्या अंतिम कक्षेत स्थिरावेल. या उपग्रहाची अँटिना अधिक प्रगत असून, त्याद्वारे संपर्क यंत्रणा अद्ययावत होणार आहे. उपग्रहावर सोलर पॅनलही बसवण्यात आली असून, त्याद्वारे हा उपग्रह ऊर्जा प्राप्त करणार आहे. आज, गुरुवारी सकाळपासून बेंगळुरूत स्थापन केलेल्या संपर्क कक्षातून या उपग्रहाला अंतिम कक्षेत धाडण्याची मोहीम सुरू होईल.
सज्जता...
- हवाई दल व लष्करास प्राप्त होणाऱ्या संदेश यंत्रणेत सुसूत्रता येणार
- जमिनीवरील रडार स्टेशन, हवाई तळ एकमेकांशी जोडले जाणार
- ड्रोन उड्डाणासाठी जमिनीवरील नियंत्रण कक्षावरील अवलंबित्व कमी
उपग्रहाद्वारे संपर्क साधणारी अनेक विमाने भारताकडे आहेत. या प्रक्षेपणामुळे ती अधिक प्रबळ होणार आहे. हवाई दलाच्या ताफ्यातील विमानांचे नेटवर्किंग व संपर्कसामर्थ्य यामुळे वाढणार आहे. - बी. एस. धनोआ, हवाई दलप्रमुख