विमानतळांवर टॅबची स्वतंत्र तपासणी नाही

टाइम्स वृत्त, नवी दिल्ली

विमानतळांवर सुरक्षा तपासणीच्या वेळी आता टॅब किंवा आय-पॅड हँडबॅगमधून काढून त्यांची स्वतंत्र तपासणी करण्याची गरज राहणार नाही. वेगळी काढता येणारी (डिटॅचेबल) बॅटरी नसलेल्या वैयक्तिक इलेक्ट्रॉनिक उपकरणांची स्वतंत्र तपासणी न करण्याचा निर्णय नागरी हवाई सुरक्षा विभागाने घेतला आहे.

विमानतळांवरील सुरक्षा तपासणीच्या वेळी सध्याच्या प्रक्रियेनुसार, प्रवाशाच्या हँडबॅगमध्ये टॅब किंवा आय-पॅड असेल, तर त्यांना तपासणीच्या वेळी तो बॅगेतून काढून स्वतंत्र ट्रेमध्ये ठेवावा लागतो आणि त्याची स्वतंत्र तपासणी करून घ्यावी लागते. आता असे करावे लागणार नाही. थोडक्यात, हँडबॅग तपासणी करताना, त्यात टॅब आणि आय-पॅड असेल, तरी चालू शकणार आहे. नागरी हवाई सुरक्षा विभागाने आपला हा निर्णय गुरुवारी केंद्रीय औद्योगिक सुरक्षा दलाला कळवला असून, या विषयावर लवकरात लवकर अंतिम निर्णय करावा, असे सांगितले आहे. जगभरात फार कमी देशांत विमानतळांवर हँडबॅगमधून टॅब काढून त्याची स्वतंत्र तपासणी करावी लागते. भारत अशा देशांपैकी एक आहे. पाश्चात्य देशांमध्ये केवळ लॅपटॉपची स्वतंत्र तपासणी केली जाते; कारण त्यांना डिटॅचेबल बॅटरी असते.