... तर माझे लग्नच झाले नसते: अखिलेश यादव

मटा ऑनलाइन वृत्त । लखनऊ

उत्तर प्रदेशात योगी आदित्यनाथांच्या सरकारने नव्याने स्थापन केलेला अँटी रोमियो स्क्वॉड टीकेचे लक्ष्य होऊ लागला आहे. माजी मुख्यमंत्री अखिलेश यादव यांनीही या अँटी रोमियो पथकावर निशाणा साधला आहे. 'नशीब माझे लग्न आधीच झाले आहे, नाहीतर आदित्यनाथांनी माझेही लग्न होऊ दिले नसते,' असा टोला अखिलेश यांनी लगावला आहे.

उत्तर प्रदेशात महिलांवर होणाऱ्या अत्याचारांच्या आणि त्यांना सामना कराव्या लागणाऱ्या दैनंदिन छेडछाडीच्या घटनांच्या पार्श्वभूमीवर असे पथक स्थापन करण्याचे आश्वासन भाजपने आपल्या जाहीरनाम्यातच दिले होते. पण या पथकाची स्थापना होताच पथकाच्या कार्यकर्त्यांनी रोडरोमियोंवर धडक कारवाई सुरू केली आहे. काही प्रेमी युगुलांना या पथकाचा मारही सहन करावा लागला आहे. या पार्श्वभूमीवर आता केवळ उत्तर प्रदेशच नाही तर देशभरातून त्यावर टीका होत आहे.

अखिलेश आणि त्यांची पत्नी खासदार डिंपल यादव यांचा प्रेमविवाह आहे. लग्नाआधीपासून त्यांचे एकमेकांवर प्रेम होते. अँटी रोमियो पथक ज्या पद्धतीने प्रेमीयुगुलांना लाठ्यांचा प्रसाद देते आहे, ते पाहता आमचे लग्न झाले नसते, असे अखिलेश म्हणाले. अखिलेश आणि डिंपल यांची ओळख त्यांच्या एका कॉमन मित्राच्या घरी झाली होती. त्यावेळी अखिलेश म्हैसूर विद्यापीठातून अभियांत्रिकीचे शिक्षण घेत होते. त्यांच्या ओळखीचे रूपांतर मैत्रीत आणि हळूहळू प्रेमात झाले.

अखिलेश यांना नंतर पुढील शिक्षणासाठी ऑस्ट्रेलियाला जावे लागले, पण यामुळे त्यांच्यात आणि डिंपल यांच्यामध्ये अंतर पडले नाही. ते लग्नाच्या निर्णयाप्रत आले, पण डिंपल राजपूत असल्याने अखिलेश यांच्या वडिलांचा-मुलायम सिंहांचा या लग्नाला विरोध होता. नंतर अमरसिंहांनी मुलायम यांचे मन वळवले आणि २५ नोव्हेंबर १९९९ मध्ये अखिलेश-डिंपलचे लग्न झाले.