'प्रत्येक नकोसा स्पर्श म्हणजे लैंगिक शोषण नव्हे'

मटा ऑनलाइन वृत्त। नवी दिल्ली

'नको असलेला प्रत्येक शारीरिक स्पर्श जो पर्यंत लैंगिक दृष्टीने केला गेला नसेल तो पर्यंत तो स्पर्श म्हणजे लैंगिक शोषण आहे असे म्हणता येत नाही', अशी टीपण्णी एका सुनावणीदरम्यान दिल्ली हायकोर्टाने केली आहे. तसा उद्देश नसताना झालेला शारीरिक स्पर्श किंवा मग विरुद्ध लिंगी व्यक्तीकडून असे झाले तर प्रत्येक वेळी हे लैगिक शोषण होत नाही अशा शब्दांत जस्टीस विभू बख्रू यांनी आपले मत मांडले आहे.

सीआरआरआयच्या एका वैज्ञानिक महिलेने लैंगिक शोषणाशी संबंधीत याचिका दाखल केली होती. यावर सुनावणी घेताना जस्टीस बख्रू यांनी हे मत मांडले आहे. आपल्या वरिष्ठ सहकाऱ्याला लैंगिक शोषणाच्या एका प्रकरणात क्लिन चीट देण्याविरुद्ध महिला वैज्ञानिकाने ही याचिका दाखल केली होती.

२००५मध्ये आरोपी वरिष्ठ वैज्ञानिकाने अचानक प्रयोगशाळेत प्रवेश करत तक्रारदार महिलेच्या हातातून सँपल हिसकावून घेतले होते. त्यानंतर तिला धक्के मारत खोलीबाहेर काढले होते असे तक्रारदार महिला वैज्ञानिकाचे म्हणणे आहे.

याबाबत महिला वैज्ञानिकाने तक्रारीत म्हटले आहे की, कोणताही नको असलेला शारीरिक स्पर्श हा लैंगिक शोषणाचाच एक भाग मानला पाहिजे. मात्र हे एक भांडणाचे प्रकरण असल्याचे या प्रकरणाचा तपास करणाऱ्या समितीने म्हटले होते. मात्र वरिष्ठ वैज्ञानिकाची ही वागणूक खेदजनक असल्याचे मत समितीने नोंदवले आहे. दोघांमध्ये शारीरिक संपर्क झाला, मात्र तो लैंगिक दृष्टीने केलेला नव्हता, तर हे प्रकरण केवळ एक भांडणाचा प्रकार होता असे समितीने स्पष्ट केले आहे.