अमर सिंह, बेनीप्रसाद यांची ‘घरवापसी’

समाजवादी पक्षाकडून राज्यसभेवर वर्णी

म. टा. विशेष प्रतिनिधी, नवी दिल्ली

उत्तर प्रदेशात पुढच्या वर्षी होणाऱ्या विधानसभा निवडणुकांपूर्वी समाजवादी पक्षात अमर सिंह तसेच त्यांचे एकेकाळचे मित्र माजी केंद्रीय मंत्री बेनीप्रसाद वर्मा यांची ‘घरवापसी’ झाली आहे. समाजवादी पक्षाने जाहीर केलेल्या राज्यसभेच्या सात उमेदवारांच्या यादीत अमर सिंह आणि बेनीप्रसाद वर्मा यांना स्थान देण्यात आले आहे.समाजवादी पक्षाचे सर्वेसर्वा मुलायमसिंह यादव यांचे एकेकाळी उजवे हात मानले जाणारे अमर सिंह आणि त्यांचे निकटचे मित्र समजले जाणारे बेनीप्रसाद वर्मा २००८ नंतर मुलायमसिंह यादव यांच्याशी बेबनाव झाल्यामुळे पक्षाबाहेर गेले होते. अमर सिंह यांची समाजवादी पक्षातून सहा वर्षांसाठी हकालपट्टी करण्यात आली होती, तर मुलायमसिंहांसोबतचे संबंध कमालीचे कटु झाल्यामुळे बेनीप्रसाद वर्मा त्यांचे कट्टर विरोधक बनले होते. वर्मा यांनी काँग्रेस पक्षात प्रवेश करून यूपीए सरकारमध्ये केंद्रात मंत्रिपदही भूषविले होते. मात्र,विधानसभा निवडणुकीसाठी मोर्चेबांधणी करताना समाजवादी पक्षात अलीकडेच १३ मे रोजी बेनीप्रसाद वर्मा यांना पुन्हा दाखल करून घेण्यात आले. आगामी निवडणुकीसाठी उत्तर प्रदेशातील कुर्मी मतदारांवर डोळा ठेवून बिहारचे मुख्यमंत्री नितीशकुमार यांनी प्रचार सुरू केला आहे. त्यामुळे कुर्मी मतदार नितीशकुमार यांच्याकडे आकृष्ट होऊ नये म्हणून बेनीप्रसाद यांना राज्यसभेवर पाठविण्यात येत आहे.