'हा' बॉम्ब आहे अमेरिकेच्या 'महाबॉम्ब'चाही बाप!

मटा ऑनलाइन वृत्त । नवी दिल्ली

अमेरिकेच्या लष्कराने अफगाणिस्तानमधील 'आयएस'च्या तळावर ज्या अणुविरहित महाबॉम्बने हल्ला केला, त्याला 'मदर ऑफ ऑल बॉम्ब्स' असं म्हटलं जात असलं, तरी त्यापेक्षा शक्तिशाली बॉम्ब रशियाकडे असल्याचं जाणकारांकडून कळतं. अमेरिकेच्या 'मॅसिव्ह ऑर्डनन्स एअर ब्लास्ट' (MOAB) पेक्षा चौपट विनाश करण्याची या बॉम्बची क्षमता असून सगळ्या बॉम्बचा 'बाप' आहे, अशी माहिती सूत्रांनी दिली.

अमेरिकेनं २००३ मध्ये MOAB बॉम्ब बनवल्यानंतर २००७मध्ये रशियानं 'फादर ऑफ ऑल बॉम्ब्स' बनवला होता. 'रशियाज एव्हिएशन थर्मोबॅरिक बॉम्ब' असं त्याचं अधिकृत नाव आहे. चाचणीदरम्यान या भयंकर अस्राचा जो स्फोट झाला, त्याचा परिणाम तब्बल एक हजार फूट परिसरावर झाला होता. त्याची क्षमता ४४ टन टीएनटी स्फोटकांइतकी होती. या बॉम्बचा स्फोट हवेतच केला जातो. त्यामुळे आग भडकते आणि लक्ष्याची क्षणार्धात वाफ होऊन जाते. या अणुविरहित बॉम्बची तुलना अगदी अण्वस्त्राशीही करता येऊ शकते.

अमेरिकेच्या मॅसिव्ह ऑर्डनन्स एअर ब्लास्टचं वजन ९ हजार ८०० किलो असून त्यात ११ टन टीएनटी (शक्तिशाली स्फोटक) होते. अफगाणिस्तानच्या नानगरहार परगण्यात ‘आयएस’चा मोठा तळ असून तो उद‍्ध्वस्त करण्याच्या हेतूने तसेच ‘आयएस’च्या म्होरक्यांना ठार मारण्याच्या हेतूने अमेरिकेनं काल एमसी-१३० या विमानातून जीबीयू-४३ डागला होता. त्यापेक्षा किमान दुप्पट मोठा धमाका 'रशियाज एव्हिएशन थर्मोबॅरिक बॉम्ब' करू शकतो. त्यातून प्रचंड ऊर्जा निर्माण होते आणि ती नियंत्रित करणं अत्यंत कठीण असतं, असं अभ्यासकांनी सांगितलं.

दरम्यान, रशियाकडे खरंच असा 'फादर ऑफ ऑल बॉम्ब्स' आहे का, याबद्दल मतमतांतरं आहेत. काही तज्ज्ञांनी तशी शंका जाहीरपणे व्यक्त केली आहे. त्याला रशियाने काहीही उत्तर दिलेलं नाही. पण, रशियाचं शस्त्रसामर्थ्य बघता असा बॉम्ब त्यांच्याकडे नसेलच, असं कुणीच ठामपणे म्हणू शकत नाही.