'कसाब'ने रोखला UPचा विकास: अमित शहा

मटा ऑनलाइन वृत्त । आझमगड

भाजपचे राष्ट्रीय अध्यक्ष अमित शहा यांनी आज येथे एका जाहीर सभेत बोलताना उत्तर प्रदेशमधील भाजप विरोधकांची तुलना मुंबईवरील दहशतवादी हल्ल्यातील आरोपी 'कसाब'च्या नावाशी केली. 'कसाब'मुळेच उत्तर प्रदेशचा विकास अडला आहे, असा घणाघात त्यांनी यावेळी केला. दरम्यान, शहा यांच्या विधानावर काँग्रेसने तीव्र शब्दांत आक्षेप घेतला आहे.

उत्तर प्रदेशला 'कसाब' नावाचा आजार झाला आहे, असे सांगत अमित शहा यांनी यावेळी 'कसाब' या उल्लेखाचा फोडही करून सांगितला. 'क' म्हणजे काँग्रेस, 'स' म्हणजे समाजवादी पार्टी आणि 'ब' म्हणजे बहुजन समाज पक्ष. या तिघांनीच उत्तर प्रदेशची पीछेहाट केली असून या 'कसाब'ला उत्तर प्रदेशमधून बाहेर काढा, असं आवाहनच त्यांनी मतदारांना केलं.

दरम्यान, काँग्रेस नेते अभिषेक मनू सिंघवी यांनी शहा यांच्या विधानावर तीव्र शब्दांत आक्षेप घेतला आहे. भाजपने पुन्हा एकदा आपला जातीयवादी चेहरा दाखवला आहे. शहा यांचं विधान त्याचंच द्योतक आहे, असा आरोप सिंघवी यांनी केला.