अमित शहा यांना राज्यसभेची उमेदवारी

नवी दिल्ली : भारतीय जनता पक्षाचे राष्ट्रीय अध्यक्ष अमित शहा हे गुजरातमधून राज्यसभेची निवडणूक लढविणार असल्याचे पक्षाचे नेते केंद्रीय मंत्री जे. पी. नड्डा यांनी बुधवारी रात्री जाहीर केले.

गुजरातमधून निवडून दिल्या जाणाऱ्या राज्यसभेच्या तीन जागांसाठी निवडणूक आठ ऑगस्ट रोजी होत असून, अमित शहा यांच्याबरोबरच केंद्रीय मंत्री स्मृती इराणी यांनाही उमेदवारी देण्यात आली आहे. इराणी यांची मुदत पुढील महिन्यांत संपत आहे. पंतप्रधान नरेंद्र मोदी आणि अमित शहा यांच्या उपस्थितीत काल झालेल्या पक्षाच्या संसदीय मंडळाच्या बैठकीत हा निर्णय घेण्यात आला. अमित शहा हे सध्या गुजरातमध्ये विधानसभेचे सदस्य आहेत.

तिसऱ्या जागेसाठी पक्षाने अद्याप उमेदवार निश्चित केलेला नाही. गुजरातमधून राज्यसभेवर जाण्यासाठी काँग्रेसकडून अध्यक्षा सोनिया गांधी यांचे राजकीय सल्लागार खासदार अहमद पटेल हे निवडणूक लढविणार असून, त्यांच्याविरोधात तगडा उमेदवार देण्याची योजना पक्षाने आखली आहे. तिसऱ्या उमेदवाराबाबत चर्चा सुरू असल्याचे नड्डा यांनी सांगितले. मध्य प्रदेशातून राज्यसभेच्या एका जागेसाठी भाजपने संपतिया उईके या आदिवासी महिला नेत्यास उमेदवार दिली आहे. केंद्रीय मंत्री अनिल माधव दवे यांच्या निधनामुळे येथे निवडणूक होत आहे.