शाह विरुद्ध पटेल युद्धात वाघेला 'गेमचेंजर'

मटा ऑनलाइन वृत्त । अहमदाबाद

गुजरातमधून राज्यसभेवर निवडून द्यावयाच्या तीन जागांसाठी आज होणाऱ्या निवडणुकीकडे आतापर्यंतची सर्वात चुरशीची निवडणूक म्हणून पाहिलं जात आहे. भाजपचे राष्ट्रीय अध्यक्ष अमित शहा स्वत: या निवडणुकीत उमेदवार असून त्यांनी काँग्रेस अध्यक्षा सोनिया गांधी यांचे राजकीय सल्लागार अहमद पटेल यांच्या पराभवासाठी जोरदार मोर्चेबांधणी केली आहे. मात्र, शह-काटशहाच्या या खेळात माजी मुख्यमंत्री शंकरसिंह वाघेला हे 'गेमचेंजर' ठरणार आहेत. वाघेला हे काँग्रेसवर नाराज असले तरी पटेल यांचे जुने मित्र असल्यानं ते कोणाच्या पारड्यात वजन टाकतात, यावर सर्वकाही अवलंबून असेल.

भाजपकडून अमित शहा, केंद्रीय मंत्री स्मृती इराणी व शंकरसिंह वाघेला यांचे व्याही बलवंत सिंह राजपूत हे मैदानात आहेत. भाजपचं विधानसभेतील संख्याबळ पाहता शहा व इराणी यांचा विजय निश्चित आहेत. तर, बलवंत सिंहांना बाहेरून काही मतांची रसद जमवावी लागणार आहे. त्यांना त्यात यश आल्यास अहमद पटेल यांचा पराभव निश्चित आहे. आतापर्यंत काँग्रेसच्या सहा आमदारांनी राजीनामा देत भाजपच्या तंबूत आश्रय घेतला आहे. त्यामुळं काँग्रेसची गोची झाली आहे. तरीही अद्याप पटेल यांना निवडून आणण्याइतपत कुमक काँग्रेसकडं आहे. ती टिकवण्याचं आव्हान काँग्रेसपुढं आहे.

नुकतेच काँग्रेस सोडलेले शंकरसिंह वाघेला यांची भूमिका आजच्या निवडणुकीत अत्यंत कळीची ठरणार आहे. पटेल हे वाघेला यांचे जुने मित्र आहेत. मात्र, भाजपनं वाघेला यांच्याच नातलगाला रिंगणात उतरवल्यानं ते द्विधा मन:स्थितीत आहेत. काँग्रेस आमदारांमध्ये वाघेला यांचे अनेक समर्थक आहेत. ते कोणाच्या पारड्यात मतं टाकतात, यावर बरंच काही ठरणार आहे.