अमृतसर दुर्घटना; 'जमावाचाच दोष'

नवी दिल्ली : दसरादिनी १९ ऑक्टोबरला रावणदहनप्रसंगी अमृतसर रेल्वे स्थानकाजवळील रेल्वेरुळांवर झालेल्या अपघाताची चौकशी करणाऱ्या रेल्वे सुरक्षा मुख्य आयुक्तांनी जमावालाच दोषी ठरवले आहे.

रुळांवर व रुळांच्या नजीक उभ्या असलेल्या जमावाच्या निष्काळजीमुळेच हा अपघात घडल्याचे आयुक्त एस. के. पाठक यांनी आपल्या अहवालात स्पष्ट केले आहे. '१०० किमी प्रतितास वेगाची मर्यादा असलेल्या या भागात रेल्वेगाडीचा वेग ८२ किमी प्रति तास होता. मात्र फटाक्यांच्या धुरामुळे व 'एस' आकाराच्या वळणामुळे केवळ २० मीटर आधीच चालकाला जमाव दिसला. तातडीने ब्रेक लावूनही रेल्वे ३८९ मीटर पुढे गेली', असे अहवालात म्हटले आहे.