न्यायालय अवमानाबद्दल माफी

चिटफंड तपासात अडथळा न आणल्याचे प. बंगालचे प्रतिज्ञापत्र

वृत्तसंस्था, नवी दिल्ली

पश्चिम बंगालमधील शारदा चिटफंड घोटाळ्याच्या तपासात अडथळा आणल्याचा सीबीआयचा आरोप प. बंगाल सरकार तसेच राज्याच्या पोलिसांनी सोमवारी सर्वोच्च न्यायालयात स्पष्टपणे फेटाळला. त्याच वेळी न्यायालयाच्या कथित अवमानप्रकरणात राज्याचे मुख्य सचिव, पोलिस महासंचालक आणि कोलकात्याचे पोलिस आयुक्त यांनी न्यायालयापुढे बिनशर्त माफीही मागितली.

सीबीआयने न्यायालयाच्या अवमानाप्रकरणी सर्वोच्च न्यायालयात केलेल्या याचिकांप्रकरणी, पश्चिम बंगालचे मुख्य सचिव मलय कुमार डे, पोलिस महासंचालक वीरेंद्र कुमार आणि कोलकात्याचे पोलिस आयुक्त राजीव कुमार यांनी सर्वोच्च न्यायालयात स्वतंत्र प्रतिज्ञापत्रे सादर केली. न्यायालयाच्या कथित अवमानाच्या प्रकरणी या तिघांनीही बिनशर्त आणि स्पष्टपणे माफी मागितली आहे. सीबीआयने आवश्यक कागदपत्रांविनाच बळाचा वापर करत कोलकाता पोलिस आयुक्तांच्या निवासस्थानी घुसण्याचा प्रयत्न केला, असा दावा राज्य पोलिसांनी सादर केलेल्या प्रतिज्ञापत्रात केला.