केजरीवाल यांनी माझे स्वप्न तोडून टाकले: अण्णा

मटा ऑनलाइन वृत्त। नवी दिल्ली

भ्रष्टाचाराविरूद्ध लढाई छेडत सत्तेवर आलेले दिल्लीचे मुख्यमंत्री अरविंद केजरीवाल यांच्यावर झालेल्या भ्रष्टाचाराचांची दखल घेत ज्येष्ठ समाजसेवक अण्णा हजारे यांनी दु:ख व्यक्त केले आहे. 'एके काळी अरविंद केजरीवाल भ्रष्टाचारविरोधी आंदोलनात माझ्यासोबत होते, आणि आता त्याच केजरीवालांवर भ्रष्टाचाराचे आरोप व्हावेत ही अत्यंत दु:खाची गोष्ट आहे', अशी प्रतिक्रिया अण्णा हजारे यांनी व्यक्त केली आहे. केजरीवाल सरकारने माझे स्पप्न यापूर्वी तोडले आहे असेही अण्णा पुढे म्हणाले.

अण्णा हजारे 'टाइम्स नाऊ' या वृत्तवाहिनीला दिलेल्या मुलाखतीत बोलत होते. त्यावेळी त्यांनी आपले मन मोकळे केले.

अण्णा पुढे म्हणाले की, या सर्व प्रकरणाचा आपण अभ्यास करू आणि त्यानंतरच यावर विस्ताराने बोलू. टीव्हीवर जे काही बघायला मिळाले त्याने आपल्याला खूप दु:ख झाले आहे. आम्ही भ्रष्टाचाराविरुद्ध लढत राहिलो. परंतु, टीव्हीवर जे काही पाहिले त्याने खूपच दु:ख झाले.

केजरीवाल यांनी राजीनामा द्यावा की नाही, यावर आताच आपण भाष्य करणार नाही असेही अण्णा हजारे म्हणाले.

'आपण गेली ४० वर्षे भ्रष्टाचाराविरुद्ध लढत आलो आहोत. दिल्लीत भ्रष्टाचारविरुद्ध झालेल्या आंदोलनामुळेच केजरीवाल मुख्यमंत्री बनले. परंतु, आज त्यांच्यावरच भ्रष्टाचाराचे आरोप झाले हे पाहून मला किती दु:ख झाले हे मी सांगू शकत नाही', असेही अण्णा पुढे म्हणाले.

केजरीवाल यांनी आपले स्पप्न तोडले का?, या प्रश्नावर अण्णा म्हणाले, ' जेव्हा मंत्रिमंडळातील ६ मंत्र्यांपैकी ३ मंत्र्यांनी राजीनामा दिला तेव्हाच माझे स्वप्न तुटले होते. केजरीवाल यांनी २ कोटी रुपये घेताना मी स्वत: पाहिले असे मंत्रिमंडळातील एक मंत्रीच सांगतो. ही अतिशय दु:खाची गोष्ट आहे असे म्हणत अण्णा हजारे यांनी केजरीवाल यांच्याबाबत अविश्वास व्यक्त केला.