विद्यार्थ्यांना वेबसाइटवर पाहण्यास उपलब्ध
म. टा. विशेष प्रतिनिधी, मुंबई
मुंबई विद्यापीठाच्या तृतीय वर्ष बीएससी संगणकशास्त्र व ह्युमन सायन्स सत्र ५ तर विज्ञान शाखेतील बीई कम्प्युटर इंजिनीअरिंग व बीई सिव्हिल इंजिनीअरिंग या शाखांच्या सत्र ७ परीक्षांचे निकाल सोमवारी रात्री उशिरा जाहीर करण्यात आले. विद्यार्थ्यांना हे निकाल वेबसाइटवर पाहता येणार आहेत.
नोव्हेंबर- डिसेंबर २०१८मध्ये झालेल्या या सर्व शाखांतील परीक्षांना १२ हजार १६८ विद्यार्थी बसले होते. परीक्षेत १० हजार ४ विद्यार्थी उत्तीर्ण झाले आहेत. या चारही परीक्षांमध्ये ५४ हजार ४३० उत्तरपत्रिकांचे मूल्यांकन करण्यात आल्याची माहिती परीक्षा विभागाने दिली.
तृतीय वर्ष बीएससी कम्प्युटर सायन्स सत्र ५च्या परीक्षेत ३ हजार ३८१ विद्यार्थ्यांनी नोंदणी केली होती, तर ३ हजार ३७८ विद्यार्थी परीक्षेस बसले होते. यातील २ हजार ३५६ विद्यार्थी उत्तीर्ण झाले. या निकालाची टक्केवारी ७१.९६ टक्के आहे. बीई कम्प्युटर इंजिनीअरिंग सत्र ७च्या परीक्षेत ५ हजार ५१७ विद्यार्थी परीक्षेस बसले होते. यातील ५ हजार १२३ विद्यार्थी परीक्षेत उत्तीर्ण झाले. या निकालाची टक्केवारी ९३.६४ टक्केआहे. बीई सिव्हिल इंजिनीअरिंग सत्र ७च्या परीक्षेत ३ हजार ३१६ विद्यार्थ्यांनी नोंदणी केली होती, तर ३ हजार २५६ विद्यार्थी परीक्षेस बसले होते. यातील २५१७ विद्यार्थी परीक्षेत उत्तीर्ण झाले आहेत. या निकालाची टक्केवारी ७८.१२ टक्के एवढी असल्याचे परीक्षा विभागाने पाठवलेल्या प्रसिद्धीपत्रकात म्हटले आहे.