नवी दिल्ली: नागरिकत्व दुरुस्ती कायद्याला विरोध करण्यासाठी दिल्ली, नोएडा आणि गुडगाव येथे प्रचंड आंदोलन सुरू आहे. हजारो लोकांनी रस्त्यावर उतरून जोरदार निदर्शने केल्याने दिल्लीत वाहतुकीची प्रचंड कोंडी झाली आहे. दिल्ली-एनसीआर आणि दिल्ली-गुडगाव मार्गावर न भूतो न भविष्यति वाहतूक कोंडी झाली आहे. सकाळपासूनच सुरू झालेल्या या वाहतूक कोंडीमुळे हजारो वाहनचालक गेल्या तीन ते चार तासांपासून वाहनांमध्येच अडकून पडले आहेत. त्यामुळे दिल्ली अक्षरश: ठप्प झाली असून नोएडामध्येही जनजीवन विस्कळीत झालं आहे.

आज सकाळपासूनच आंदोलकांनी दिल्लीतील मुख्य रस्त्यांवर उतरून रास्तारोको केल्याने दिल्लीकरांना त्याचा प्रचंड फटका बसला आहे. दिल्ली-गुडगाव मार्गावर वाहनांच्या रांगाच रांगा लागल्या आहेत. दिल्ली-गुडगाव रोडवरही तीन ते चार किलोमीटरपर्यंत वाहनांच्या रांगा आहेत. तसचे महामाया उड्डाणपूल आणि गुडगावच्या सरहौल टोल नाक्यावरही वाहनांच्या रांगाच रांगा लागल्याने वाहनचालकांची प्रचंड कोंडी झाली आहे. दिल्ली वाहतूक पोलिसांकडून ट्विटरद्वारे वाहतूक कोंडीची माहिती दिली जात आहे.

CAA: लेखक रामचंद्र गुहा पोलिसांच्या ताब्यात


नागरिकत्व कायद्याविरोधात सुरू असलेल्या आंदोलनाच्या पार्श्वभूमीवर दिल्ली पोलिसांनी दिल्लीतील प्रत्येक रस्त्यांवर वाहनांची तपासणी सुरू केली आहे. वाहनांच्या तपासणीत वेळ जात असल्यामुळेही वाहतूक कोंडी झाली आहे. आंदोलकांच्या रॅलीमुळे दिल्ली गेटपासून जीपीओपर्यंत मोठी वाहतूक कोंडी झाली असून सुभाष मार्ग, पीली कोठी, श्यामा प्रसाद मुखर्जी मार्ग, लाल किल्ला आणइ जुन्या दिल्लीतील रेल्वे स्टेशन मार्गावरही मोठी कोंडी झाली, असल्याचं वाहतूक पोलिसांनी सांगितलं.

दिल्ली-गुडगाव सीमेवर झालेल्या वाहतूक कोंडीमुळे सीमाभागातील वाहतूक पूर्णपणे ठप्प झाली आहे. बाइकला सुद्धा जाण्यासाठी जागा उरलेली नाही. त्यामुळे बाइकस्वारही वाहतूक कोंडीत सकाळपासून अडकले आहेत. या वाहतूक कोंडीत रुग्णवाहिकाही अडकल्या आहेत. दरम्यान, दिल्लीतील १८ मेट्रो स्टेशनही बंद ठेवण्यात आल्याने नागरिकांचे प्रचंड हाल होत आहेत. दिल्लीतील काही शाळांनी तर पालकांना मेसेज पाठवून त्यांच्या पाल्यांना घेऊन जाण्याची व्यवस्था करण्याची विनंतीही केली आहे. ठिकठिकाणी होत असलेल्या आंदोलनामुळे पालकांनाही प्रचंड त्रासाला सामोरे जावं लागत आहे.

CAA Live: मुंबईत मुस्लिम संघटनांचा मोर्चा