ऋषी कपूर, अब्दुल्ला देशद्रोही; वाराणसीत पोस्टर

मटा ऑनलाइन वृत्त । वाराणसी

पाकव्याप्त काश्मीरच्या मुद्द्यावर वादग्रस्त विधान करणारे जम्मू-काश्मीरचे माजी मुख्यमंत्री फारुख अब्दुल्ला आणि अभिनेते ऋषी कपूर हे देशद्रोही आहेत, अशा आशयाचे पोस्टर वारणसीत ठिकठिकाणी लावण्यात आले आहेत. याआधी मानवाधिकार जनशक्ती पक्षाने त्यांच्याविरोधात वाराणसीत तक्रार दाखल केली होती.

काही दिवसांपूर्वी फारुख अब्दुल्ला यांनी पाकव्याप्त काश्मीरच्या मुद्द्यावर विधान करून वाद ओढवून घेतला होता. पाकव्याप्त काश्मीर पाकिस्तानचा भाग आहे आणि तो पाकिस्तानकडून कोणी हिसकावून घेऊ शकत नाही, असे ते म्हणाले होते. यावरून अनेकांनी त्यांच्यावर टीकेची झोड उठवली होती. मात्र, अभिनेते ऋषी कपूर यांनी त्यांच्या वक्तव्याचे समर्थन केले होते. त्यामुळे मानवाधिकार जनशक्ती पक्षाचे राष्ट्रीय प्रवक्ते चंद्रशेखर सिंह यांनी गुरुवारी दोघांविरोधात वाराणसीत तक्रार दाखल केली होती. देशाची एकता आणि अखंडतेविरोधात वक्तव्य करणाऱ्यांना शिक्षा करण्यात यावी, अशी विनंती त्यांनी न्यायालयाकडे केली होती. न्यायालयानेही त्यांची याचिका दाखल करून घेतली असून त्यावर २१ नोव्हेंबरला सुनावणी होणार आहे.