...तर पुन्हा सर्जिकल स्ट्राइक: लष्करप्रमुख

मटा ऑनलाइन वृत्त । नवी दिल्ली

सीमेपलिकडून सुरू असलेला गोळीबार न थांबल्यास पुन्हा सर्जिकल स्ट्राइक करण्याचा इशारा लष्करप्रमुख बिपीन रावत यांनी दिला आहे. मागील काही काळापासून सीमेपलिकडून वारंवार शस्त्रसंधीचे उल्लंघन होत आहे. त्यामुळे सीमेवर तणावाची परिस्थिती निर्माण झाली आहे. शस्त्रसंधीच्या सतत होणाऱ्या उल्लंघनाबाबत लष्करप्रमुखांना प्रश्न विचारण्यात आला होता. त्यावेळी लष्करप्रमुख बिपिन रावत यांनी उत्तर दिले.

शस्त्रसंधीचे उल्लंघन करत गोळीबार करण्याच्या घटना कमी झाल्या असल्याचे लष्करप्रमुखांनी यावेळी नमूद केले. मात्र, भविष्यात शस्त्रसंधीचे उल्लंघन होत राहिल्यास सर्जिकल स्ट्राइकसारखा पर्याय वापरण्यात येणार असल्याचा इशारा रावत यांनी दिला. भारताविरोधात पाकिस्तान करत असलेल्या छुप्या युद्धामुळे देशाच्या ऐक्याला धोका निर्माण झाला आहे, असं रावत म्हणाले.

पाकिस्तानच्या ताब्यात असलेल्या सैनिकांना सोडवण्याची एक प्रक्रिया पार पाडावी लागत असून ती प्रक्रिया सुरू असल्याचे त्यांनी म्हटले. भारतीय लष्कराला अधिक सक्षम करण्याचे प्रयत्न सुरू आहे. शस्त्राशस्त्रांपासून ते इतर सर्व बाबींमध्ये लष्कराचे सक्षमीकरण सुरू असल्याची माहिती रावत यांनी दिली.