पाकच्या BAT मधील दोन दहशतवाद्यांचा खात्मा

मटा ऑनलाइन वृत्त । काश्मीर

जम्मू-काश्मीरमधील उरी सेक्टरमध्ये भारतीय लष्कराने पाकिस्तानच्या बॉर्डर अॅक्शन टीम (BAT)मधील दोन दहशतवाद्यांचा खात्मा करत भारतीय जवानांच्या हत्येचा बदला घेतला आहे. १ मे रोजी पाकच्या BAT ने भारतीय जवानांच्या मृतदेहाची विटंबना करत त्यांचे शिर कापले होते.

भारतीय जवानांवर हल्ला करून त्यांच्या मृतदेहांची विटंबना करण्यात पाकस्तानची BAT कुख्यात आहे. याच BAT मधील दहशतवाद्यांनी पुन्हा उरी सेक्टरमध्ये नियंत्रण रेषे (LoC)वर गस्ती घालणाऱ्या भारतीय जवानांच्या पथकावर हल्ला केला. पण भारतीय जवानांनी BAT चा हल्ला उधळून लावत त्यातील दोन दहशतवाद्यांना कंठस्नान घातलं. पाकच्या BAT ला भारतीय जवानांनी चोख उत्तर दिलं, अशी माहिती लष्कराने दिली आहे.

भारतीय जवानांनी ठार मारलेल्या BAT मधील दोन्ही दहशतवाद्यांचे मृतदेह LoC बेवारस अवस्थेत पडून आहेत, अशी माहिती पोलिसांनी दिली.

BAT action against #IndianArmy patrol along LC in Uri Sector foiled. Two BAT terrorists killed. @adgpi — ChinarCorps.IA (@Chinarcorps_IA) May 26, 2017

पाकच्या BAT ने यापूर्वी अनेकदा भारतीय जवानांचा शिरच्छेद करून त्यांच्या मृतदेहाची विटंबना केली आहे. पाकच्या विशेष सेवा दलातील अधिकाऱ्यांनी BAT ची स्थापना केली आहे. या BAT मध्ये पाक जवानांसोबत दहशतवाद्यांचाही समावेश असतो.

यापूर्वी BAT ने १ मे रोजी सीमा सुरक्षा दला (BSF) च्या दोन जवानांची हत्या करून त्यांच्या मृतदेहाची विटंबना केली होती. गेल्या २८ ऑक्टोबरला एका जवानाची आणि जानेवारी २०१३ मध्येही एका जवानाची हत्या करून मृतदेहाची विटंबना करण्यात आली होती.