जम्मूः दहशतवाद्यांनी केली जवानाची हत्या

श्रीनगरः

जम्मू काश्मीरमधील बारामुल्ला भागात सुट्टीवर आलेल्या एका जवानाची दहशतवाद्यांनी हत्या केल्याची घटना घडली आहे. हत्या करण्यात आलेल्या जवानाचे नाव मोहम्मद रफी यातू असे आहे.

मिळालेल्या माहितीनुसार, बारामुल्ला जिल्ह्यातील सोपोर भागात संशयित दहशतवाद्यांनी जवानाची हत्या केली. मोहम्मद रफी यातू आपल्या घरी असताना दहशतवाद्यांनी येऊन अंधाधूंद गोळीबार केला. दहशतवाद्यांनी केलेल्या गोळीबारात रफी गंभीर जखमी झाले. जखमी रफींना तातडीने रुग्णालयात दाखल करण्यात आले. मात्र, उपचारादरम्यान रफी यांचा मृत्यू झाला. यानंतर जवानांनी या भागाला चारही बाजूने वेढा घातला असून, दहशतवाद्यांना शोधण्यासाठी भारतीय लष्कराने शोधमोहीम हाती घेती आहे.

दरम्यान, गेल्या काही काळापासून सुट्टीवर घरी परतलेल्या जवानांवर दहशतवादी हल्ला करण्याच्या घटनांमध्ये वाढ झाली आहे. दक्षिण काश्मीरमधील अनंतनाग, पुलवामा, कुलगाम आणि शोपिया या जिल्ह्यातील राहणारे जवान आणि पोलीस कर्मचाऱ्यांना दहशतवादी आपले लक्ष्य करत असल्याचे समोर येत आहे. या भागातील सुरक्षारक्षकांची संपूर्ण माहिती दहशतवादी संघटना असल्याचे सांगण्यात येत आहे.