लष्करातील जवानाकडून मेजरचा खून

मटा ऑनलाइन वृत्त । नवी दिल्ली

जम्मू-काश्मीरमध्ये दहशतवाद्यांशी लढणाऱ्या भारतीय लष्कराला धक्का देणारी एक घटना घडली आहे. येथील उरी सेक्टरमध्ये राष्ट्रीय रायफल्सच्या एका जवानानं आपल्याच तुकडीतील वरिष्ठ अधिकाऱ्याचा गोळ्या झाडून खून केला आहे.

शिखर थापा असं मृत अधिकाऱ्याचं नाव असून ते 'मेजर' पदावर कार्यरत होते. सूत्रांनी दिलेल्या माहितीनुसार, थापा यांनी आरोपी जवानाला कर्तव्यावर असताना मोबाइल वापरल्याबद्दल जाब विचारला होता. पुन्हा असं झाल्यास कारवाई करण्याचा इशाराही दिला होता. त्यानंतर थापा यांनी आरोपी जवानाचा मोबाइल जप्त केला होता. जप्तीच्या काळात मोबाइलचं थोडंफार नुकसान झाल्याचं सांगितलं जातं. त्याचाच राग मनात धरून त्यानं थापा यांच्यावर गोळ्या झाडल्या. या घटनेनंतर त्यांना तातडीनं रुग्णालयात हलवण्यात आलं. मात्र, उपचारादरम्यान त्यांचा मृत्यू झाला. आरोपी जवानाला अटक करण्यात आली आहे. मात्र, त्याचं नाव अद्याप समोर आलेलं नाही.