- लोकसभा, राज्यसभेत विरोधी बाकांवर आसनव्यवस्था
- संसद अधिवेशन प्रारंभाच्या पूर्वसंध्येस अधिकृत घोषणा
वृत्तसंस्था, नवी दिल्ली
महाराष्ट्राच्या आणि पर्यायाने देशाच्या राजकारणात काही काळ वगळता सुमारे तीन दशके टिकून असलेली भारतीय जनता पक्ष व शिवसेना यांची युती पुन्हा एकदा तुटल्याच्या वास्तवावर अखेर अधिकृत शिक्कामोर्तब झाले असून, आज, सोमवारी सुरू होत असलेल्या संसदेच्या हिवाळी अधिवेशनात लोकसभा व राज्यसभा या दोन्ही सभागृहांत शिवसेनेच्या सदस्यांची आसनव्यवस्था विरोधी बाकांवर करण्यात आल्याची घोषणा केंद्रातील मोदी सरकारने केली आहे. महाराष्ट्रात शिवसेना, राष्ट्रवादी काँग्रेस व काँग्रेस यांच्या महाशिवआघाडीचे सरकार स्थापन होण्याच्या हालचाली सुरू असल्याच्या पार्श्वभूमीवर केंद्रातील सत्ताधारी राष्ट्रीय लोकशाही आघाडीतून (एनडीए) शिवसेना बाहेर पडली आहे.
मुख्यमंत्रिपदावरून शिवसेना व भाजप यांच्यात कटुता निर्माण झाल्यानंतर आधी पडद्याआडून व नंतर थेटच नव्या समीकरणांसाठी शिवसेना, राष्ट्रवादी काँग्रेस व काँग्रेस यांच्या हालचाली सुरू झाल्या. केंद्रातील शिवसेनेचे एकमेव मंत्री अरविंद सावंत यांनी गेल्या सोमवारी आपल्या मंत्रिपदाचा राजीनामा दिला. मात्र त्यानंतरही शिवसेना केंद्रातील सत्ताधारी एनडीएतून बाहेर पडल्याची अधिकृत घोषणा करण्यात आली नव्हती. अखेर संसदेचे हिवाळी अधिवेशन आज, सोमवारी सुरू होत असताना, रविवारी त्याबाबतची अधिकृत माहिती जाहीर करण्यात आली.
महाराष्ट्रात राष्ट्रवादी व काँग्रेस यांच्यासोबत आघाडी करण्याचे शिवसेनेचे प्रयत्न सुरू आहेत. शिवसेनेच्या मंत्र्याने राजीनामा दिलेला आहे. त्यामुळे संसदेच्या दोन्ही सभागृहांत शिवसेनेचे खासदार विरोधी बाजूला बसतील. तशी आसनव्यवस्था करण्यात आली आहे, अशी माहिती संसदीय कामकाजमंत्री प्रल्हाद जोशी यांनी रविवारी सर्वपक्षीय बैठकीनंतर पत्रकारांना दिली. 'एनडीएच्या आजच्या बैठकीला शिवसेना खासदार उपस्थित राहणार नाहीत, हे स्पष्ट आहे. त्यामुळे त्या पक्षाच्या खासदारांची आसनव्यवस्था विरोधी बाकांवर करणे स्वाभाविकच आहे', असे जोशी यांनी नमूद केले.