राखी सावंतच्या विरोधात अटक वॉरंट

मटा ऑनलाइन वृत्त । लुधियाना

येथील स्थानिक न्यायालयाने बॉलिवूड अभिनेत्री राखी सावंतविरोधात अटक वॉरंट जारी केले आहे. 'रामायणकार' वाल्मिकींबाबत अपशब्द काढून वाल्मिकी समाजाच्या भावना दुखावल्याचा आरोप तिच्यावर आहे. वारंवार समन्स बजावूनही न्यायालयात हजर न राहिल्याने तिला हे वॉरंट बजावण्यात आले असल्याचे वृत्त पीटीआय वृत्तसंस्थेने दिले आहे.

लुधियानाचे २ पोलीस हे वॉरंट घेऊन मुंबईच्या दिशेने रवाना झाले आहेत. गेल्यावर्षी एका खासगी वाहिनीवर वाल्मिकी ऋषींबद्दल अपमानास्पद प्रतिक्रिया दिल्याची तक्रार राखीविरोधात दाखल झाली होती. 'आपल्या वक्तव्यामुळे राखीने वाल्मिकी ऋषींना मानणाऱ्या मोठ्या जनसमुदायाच्या भावना दुखावल्या आहेत,' असा आरोप या तक्रारीत करण्यात आला होता.

या तक्रारीवर येथील न्यायालयात ९ मार्चला अखेरची सुनावणी होती. पण राखी या सुनावणीसाठी हजर राहिली नाही. तिला यापूर्वीही कोर्टात हजर राहण्यासाठी समन्स बजावण्यात आले होते. अखेरच्या सुनावणीच्या वेळीही गैरहजर राहिल्याने ९ मार्चला न्यायालयाने तिच्याविरोधात अटक वॉरंट जारी केले. यापुढील सुनावणी १० एप्रिल रोजी होणार आहे.