मानुषीमुळे अन‌िष्ट परंपरांना मूठमाती

टाइम्स वृत्त, झज्जर (हरयाणा)

मानुषी छिल्लर मिस वर्ल्ड झाल्यापासून देशभरात तिचीच चर्चा आहे. ‌आपल्या गावातल्या मुलीने म‌िळवलेल्या दैदिप्यमान यशाने तिच्या आजोळीही बदलाचे वारे वाहू लागले आहेत. उत्तरेकडील राज्यांमधील कोणत्याही सामान्य गावांपैकी एक वाटावे असे बामडोली गाव मानुषीचे आजोळ. बामडोलीबरोबरच दिल्लीतील निजामपूर आणि झज्जर येथील कहनोद या गावांतील खाप पंचायतीने अनिष्ट परंपरांना मूठमाती देण्याचा महत्त्वपूर्ण निर्णय घेतला आहे.

तब्बल १७ वर्षांनी विश्वसुंदरीचा किताब जिंकून भारताच्या शिरपेचात मानाचा तुरा खोवणाऱ्या मानुषी छिल्लरवर जगभरातून कौतुकाचा वर्षाव होतो आहे. आपल्या नावाच्या अर्थाप्रमाणे तिनं अनेक प्रसंगातून ‘माणुसकी’चं दर्शन घडवले आहे. त्यामुळे अनेक भारतीय तिच्याकडून आदर्श घेत असताना तिचे आजोळ कसे मागे राहील? हरयाणा आणि इतर काही राज्यांतील गावांमध्ये विवाहाप्रसंगी हवेत गोळीबार करण्याची प्रथा आहे. पुरुषप्रधान मानसिकतेतून आलेल्या या प्रथेमुळे दरवर्षी अनेकजण जखमी होतात, काहींना तर प्राणही गमवावे लागतात. त्यामुळे लग्न समारंभातील गोळीबार आणि डीजेचा धिंगाणा बंद करण्याचा निर्णय बामडोलीसह अजून ११ गावांच्या खाप पंचायतींनी घेतला आहे.

कहनोद या गावच्या खाप पंचायतीचे गुलाब सिंग छिक्कारा ‘टाइम्स ऑफ इंडिया’शी बोलताना म्हणाले की, ‘मानुषी ही आमच्या गावची नात आहे. तिच्या या विजयामुळे आमच्या गावाचे नावही प्रसिद्ध झाले आहे. साऱ्या जगाचे लक्ष आमच्या गावाकडे लागले आहे. त्यामुळे या संधीचा फायदा घेत आम्ही गावात काही सामाजिक सुधारणा करणार आहोत.’

तब्बल सतरा वर्षांनी ‘मिस वर्ल्ड’चा चमचमता मुकूट भारताला ज‌िंकून देणाऱ्या ‘एफबीबी कलर्स फेमिना मिस इंडिया’ मानुषी छिल्लरचे शनिवारी रात्री उशिरा भारतात आगमन झाले. यावेळी तिच्या चाहत्यांनी मुंबई विमानतळावर एकच गर्दी केली होती. फॅन्सकडून झालेल्या जंगी स्वागतामुळे मानुषीही भारावली होती.