आशा कुमारीही वादाच्या भोवऱ्यात

नवी दिल्लीः दिल्लीतील शीखविरोधी दंगलीतील कथित सहभागामुळे वादग्रस्त झालेले कमलनाथ यांच्या जागी पंजाब प्रदेश काँग्रेसच्या प्रभारीपदी अखिल भारतीय काँग्रेसच्या पदाधिकारी तसेच हिमाचल प्रदेशच्या आमदार आशा कुमारी यांची नियुक्ती करीत काँग्रेसने आणखी एक नवा वाद ओढवून घेतला.

आशाकुमारी यांना वनजमीन हडपल्याच्या प्रकरणात आशाकुमारी यांना कनिष्ठ न्यायालयाने दोषी ठरवून एक वर्षाची शिक्षा सुनावली आहे. आशाकुमारी सध्या जामीनावर मुक्त असून त्यांचा खटला वरच्या न्यायालयात प्रलंबित आहे. मात्र, काँग्रेसचे ज्येष्ठ नेते आणि प्रवक्ते कपिल सिब्बल यांनी आशाकुमारी यांच्या नियुक्तीचे समर्थन केले. खुनाच्या आरोपात सध्या जामीनावर असलेले अमित शहा जर भाजपचे राष्ट्रीय अध्यक्ष होऊ शकतात, तर आशा कुमारी प्रभारी का होऊ शकत नाही, असा सवाल सिब्बल यांनी केला. आशा कुमारी यांनी नियुक्ती झाल्यानंतर आज सकाळी काँग्रेस अध्यक्ष सोनिया गांधी यांची भेट घेतली. यामुळे आता पंजाबमध्ये सत्तेत पुनरागमन करु पाहणाऱ्या काँग्रेसला नव्या लज्जेला सामोरे जावे लागत आहे.