राम रहीमच्या डेऱ्यात ३०० लोकांच्या अस्थी

मटा ऑनलाइन वृत्त । सिरसा

डेरा सच्चा सौदाचे शेकडो एकर आवार असलेल्या मुख्यालयात माणसांचे सांगाडे पुरल्याचे वृत्त पुन्हा एकवार पुढे आले आहे. डेराचे उपाध्यक्ष डॉ. पी. आर. नैन यांनी विशेष तपास पथकाला (एसआयटी) ३०० लोकांची एक यादी सोपवली आहे. हे ते ३०० लोक आहेत ज्यांच्या अस्थी (अंत्यसंस्कारांनंतर) डेराच्या शेतांमध्ये मोक्ष मिळण्याच्या इच्छेने पुरण्यात आली आहेत. एसआयटीचे प्रमुख कुलदीप बेनीवाल यांनी एनबीटीशी बोलताना या यादीच्या वृत्ताला दुजोरा दिला आहे. मात्र जमिनीत कोणते सांगाडे आहेत हा याची माहिती त्यांच्याकडे नाही.

डॉ. नैन यांनी चौकशीत डेऱ्यात ६०० जणांच्या अस्थी आणि सांगाडे पुरलेले असल्याची माहिती दिली का हे विचारता मात्र बेनीवाल यांनी नकार दिला. बेनीवाल यांनी सोमवारी डेरा सच्चाचे अध्यक्ष विपासना आणि मंगळवारी डॉ. नैन यांना चौकशीसाठी बोलावले होते. नैन यांनी ३०० जणांची यादी एसआयटीला दिली आहे. या लोकांच्या नातेवाईकांनीच त्यांच्या अंत्यसंस्कारांनंतर अस्थी आणि राख डेराच्या शेतांमध्ये पसरून टाकण्यासाठी दिली, असा दावा करण्यात आला आहे. ही डेराची जुनी परंपरा आहे असं नैन यांनी सांगितलं. या यादीची पडताळणी करण्यात येणार असल्याचं बेनीवाल यांनी सांगितलं.

डेरा सच्चा सौदाचे प्रमुख राम रहीम गुरमीत यांना अटक झाल्यानंतर डेऱ्यात सांगाडे पुरले असल्याच्या बातम्या जुन्या सेवकांच्या हवाल्याने पुढे येत होत्या. काही लोकांची हत्या करून त्यांचे सांगाडे तिथे पुरले असल्याचे आरोपही राम रहीमवर होत आहेत. कोर्टाच्या आदेशांनंतर डेराच्या आवाराची तपासणीही झाली. खोदकामही करण्यात आले. पण सांगाडे बाहेर काढण्याची अधिकृत सूचना मिळालेली नाही.