पद्मिनी महालाबाहेरचा 'तो' शिलालेख झाकला!

मटा ऑनलाइन वृत्त । जयपूर

'पद्मावती' चित्रपटाला होत असलेल्या विरोधाची झळ आता चित्तोडगढ किल्ल्यापर्यंत पोहोचली असून अलाउद्दीन खिलजीने राणी पद्मिनीला पाहिल्याचा उल्लेख असलेला येथील शिलालेख झाकून टाकण्यात आला आहे. किल्ल्यावरील पद्मिनी महालाबाहेर हा शिलालेख असून राजपूत करणी सेनेने दिलेल्या धमकीच्या पार्श्वभूमीवर हे पाऊल उचलण्यात आले आहे.

भारतीय पुरातत्व विभागाने हा शिलालेख लावला असून पद्मिनी महालात अलाउद्दीन खिलजीने राणी पद्मिनीला पाहिले होते, असा उल्लेख या शिलालेखावर करण्यात आला आहे. करणी सेनेच्या सदस्यांनी या शिलालेखावर आक्षेप घेतला असून हा शिलालेख तत्काळ हटवण्यात यावा अशीही मागणी केली आहे. या पार्श्वभूमीवर पुरातत्व विभागाने कोणताही अनुचित प्रकार घडू नये म्हणून हा शिलालेख कपड्याने झाकून टाकला आहे.

जोधपूर येथील विभागीय कार्यालयाच्या उच्च प्राधिकाऱ्यांच्या परवानगीने हा शिलालेख झाकण्यात आल्याचे एका अधिकाऱ्याने सांगितले.

दरम्यान, या शिलालेखातील माहितीला कोणताही आधार नाही. इतिहासाला धक्का पोहोचवणारा हा प्रकार आहे. त्यामुळे केवळ शिलालेखच नव्हे तर हा उल्लेख ज्या ज्या पुस्तकांमध्ये आहे तिथूनही तो हटवण्यात यावा, अशी मागणीही राजपूत समाजाने केली आहे.