उत्तर प्रदेशात ६५.५ टक्के मतदान

मटा ऑनलाइन वृत्त । लखनऊ/डेहराडून

उत्तराखंड विधानसभेच्या ६९ जागांसाठी व उत्तर प्रदेश विधानसभेच्या दुसऱ्या टप्प्यासाठी आज मतदान झाले. सायंकाळी ५ वाजेपर्यंत उत्तर प्रदेशात ६५.५ टक्के तर उत्तराखंडमध्ये ६८ टक्के मतदानाची नोंद झाली. सकाळच्या सत्रात मंदावलेला मतदानाचा वेग उत्तरोत्तर वाढत गेला. दुपारनंतर मतदार मोठ्या संख्येनं बाहेर पडले.

उत्तर प्रदेशातील दुसऱ्या टप्प्यात सुमारे ७२० उमेदवार आपले नशीब आजमावत आहेत. दोन्ही राज्यांमध्ये मतदानाच्या पार्श्वभूमीवर कडेकोट सुरक्षाव्यवस्था ठेवण्यात आली होती. पंतप्रधान नरेंद्र मोदी यांनी टि्वट करून दोन्ही विधानसभेतल्या मतदारांना आपला मतदानाचा हक्क बजावत मोठ्या प्रमाणावर मतदान करण्याचे आवाहन केले होते.

दिग्गजांचे भवितव्य मतपेटीत

उत्तराखंडामध्ये मुख्यमंत्री हरीश रावत यांचं भवितव्य आज मतदानयंत्रात बंद झालं असून उत्तर प्रदेशात आझम खान यांचा कस लागणार आहे.

उत्तर प्रदेशातले महत्त्वाचे उमेदवार

आझम खान (सप), भागवत शरण (सप), जितिन प्रसाद (काँग्रेस), राजेश अग्रवाल (भाजप), महबूब अली (सप), अब्दुल्ला आझम (सप), चेतन चौहान (भाजप), रियाझ अहमद (सप)

उत्तराखंडमधील महत्त्वाचे उमेदवार

मुख्यमंत्री हरीश रावत (काँग्रेस), स्वामी यतीश्वरानंद (भाजप), सौरभ बहुगुणा (माजी मुख्यमंत्री विजय बहुगुणा यांचे पुत्र- भाजप), मालती बिस्वास (काँग्रेस), मुक्काराम अली (बसप), राजेश शुक्ल (भाजप) किशोर उपाध्याय (काँग्रेस), सहदेव पुंडीर (भाजप), सरिता आर्य (काँग्रेस), संजीव आर्य (भाजप).