'चीप'च्या भीतीने चोरांनी नोटा खर्च केल्या नाही

मटा ऑनलाइन वृत्त । नवी दिल्ली

तीन चोरांनी आधी फिल्मी स्टाईलनं एटीएमच्या व्हॅनमधून पैसे लुटले...त्यानंतर कुणाला संशय येऊ नये म्हणून ते हरिद्वारला गेले...पण नोटांमध्ये चीप असून त्यामुळे आपण पकडले जाऊ अशी भीती वाटल्याने त्यांनी नोटा खर्चच केल्या नाहीत, तसेच दिल्लीला परतले आणि पोलिसांच्या जाळ्यात सापडले. एखाद्या सिनेमाचा प्रसंग वाटावा अशी ही घटना नवी दिल्लीत घडली असून तिन्ही आरोपींना तुरुंगात डांबण्यात आलं आहे.

बिट्टू, रोहित नागर आणि सनी शर्मा असे या तिन्ही आरोपींची नावं आहेत. या तिघांनी ही चोरी केली. या चोरीच्या घटनेचा मास्टरमाइंड असलेल्या बिट्टूने सगळी योजना आखली. तिघांनी आधी नवी दिल्लीच्या सिव्हील लाइन्स परिसरातून मोटारसायकल चोरल्या. त्यानंतर करावल नगरमध्ये जाऊन बाइकच्या नंबर प्लेट बदलल्या. चोरी करण्याच्या तीन दिवस आधी त्यांनी वेगवेगळ्या ठिकाणी पोहचणाऱ्या एटीएम व्हॅनवर पाळत ठेवली. एटीएम व्हॅन किती वाजता कुठून निघते? किती वाजता एटीएमला पोहचते? गाडीत किती सुरक्षा रक्षक असतात आदी माहिती त्यांनी मिळवली. या काळात त्यांनी व्हॅन लुटण्याचा तीनदा प्रयत्नही केला. १९ तारखेला तर पुर्ण दिवस व्हॅनचा पाठलाग करुन व्हॅन लुटण्याचा प्रयत्न केला. पण लक्ष्मी नगर, निर्माण विहार क्षेत्र आणि शकरपूर परिसरात गर्दी असल्याने त्यांचा प्रयत्न फसला. अखेर प्रताप गंज क्रॉसिंगवर त्यांनी डाव साधत बंदूकीच्या धाकाने व्हॅनमधील ९.५ लाख रुपये पळविले.

टीव्ही पाहिला अन...

पळून जाताना त्यांनी बाइक घटनास्थळीच टाकून दिल्या होत्या. कुणाला संशय येऊ नये म्हणून त्यांनी तीन वेळा रिक्षा बदलली आणि घर गाठले. त्यानंतर दुसऱ्याच दिवशी हे तिघेही हरिद्वारला आले. पण नोटांमध्ये चीप असल्याचे चॅनेलवर ऐकले आणि त्यांचा भ्रम निरास झाला. पकडले जाऊ या भीतीनं नोटा खर्च न करता ते दिल्लीत आले आणि पोलिसांच्या हाती लागले.