पंचतारांकित हॉटेलं टाळा; मोदींची मंत्र्यांना तंबी

मटा ऑनलाइन वृत्त । नवी दिल्ली

पंचतारांकित हॉटेलांमधील वास्तव्य टाळा, आपल्या खात्याशी संबंधित कोणत्याही सार्वजनिक क्षेत्राच्या सोयीसुविधा घेऊ नका, अशी तंबी पंतप्रधान नरेंद्र मोदी यांनी त्यांच्या मंत्र्यांना दिली आहे. बुधवारी झालेल्या मंत्रीमंडळ बैठकीनंतर त्यांनी मंत्र्यांना थांबायला सांगितले आणि या सूचना दिल्या.

दौऱ्यावर असताना काही मंत्र्यांच्या पंचतारांकित हॉटेलांमध्ये उतरण्यावरून पंतप्रधान मोदी नाराज असल्याचं बोललं जात आहे. त्यांनी स्पष्ट केलंय की मंत्र्यांनी आपल्या सरकारी दौऱ्यादरम्यान सरकारी सोयींचाच वापर करायला हवा. पंचतारांकित हॉटेलांमध्ये वास्तव्याची 'चटक' दूर ठेवायला हवी. काही मंत्री त्यांच्या अखत्यारितल्या खात्यांशी संबंधित निमशासकीय कार्यालयांच्या गाड्यांचा वापर करतात, अशी माहिती मिळाल्याने आपण नाराज असल्याचे मोदींनी मंत्र्यांना सांगितले. अशाप्रकारे गाड्यांचा मंत्र्यांकडून किंवा त्यांच्या कुटुंबीयांकडून झालेला गैरवापर खपवून घेतला जाणार नाही, असेही मोदींनी बजावले.

भ्रष्टाचाराविरोधातत आपल्या 'झिरो टॉलरन्स'च्या धोरणाबाबत कोणतीही तडजोड केली जाणार नाही, हेही मोदींनी आपल्या मंत्र्यांसमोर पुन्हा एकवार स्पष्ट केले. लोकसभा निवडणुकांना अद्याप दोन वर्षे बाकी आहेत. सरकारची 'स्कॅमफ्री' (शून्य घोटाळे) प्रतिमा कायम राहावी, असे मोदींना वाटते.