लालूंची रॅली टाळून राहुल नॉर्वेला जाणार

नवी दिल्ली : राष्ट्रीय जनता दलाने उद्या, रविवारी पाटण्यात आयोजित केलेली ‘बीजेपी भगाव देश बचाव’ रॅलीला काँग्रेस उपाध्यक्ष राहुल गांधी अनुपस्थित राहणार असल्याचे शुक्रवारी स्पष्ट झाले. राहुल गांधी हे पाटण्याऐवजी नॉर्वेला जाणार असल्याचे त्यांनीच जाहीर केले. यामुळे या रॅलीत विरोधी पक्ष एकवटणार नसल्याचेही उघड झाले आहे.

‘नॉर्वेच्या परराष्ट्र मंत्रालयाच्या आमंत्रणावरून काही दिवस ओस्लेला जात आहे. तेथे बैठक आणि राजकीय नेते, उद्योगपती तसेच विविध संस्थांना भेटी देणार आहे,’ असे ट्विट राहुल गांधी यांनी केले. यामुळे राहुल गांधी हे रॅलीस जाणार नसल्याचे स्पष्ट झाले. राष्ट्रीय जनता दलाचे नेते लालूप्रसाद यादव आणि त्यांचे चिरंजीव तेजस्वी यांनी भाजप व केंद्र सरकारच्या विरोधात ही रॅली आयोजित केली असून, त्यास देशातील विरोधी पक्षांच्या प्रमुख नेत्यांना आमंत्रित केले आहे. मात्र या रॅलीस उपस्थित राहणार नसल्याचे बहुजन समाज पक्षाच्या नेत्या मायावती यांनी गुरुवारी जाहीर केले. काँग्रेस अध्यक्ष सोनिया गांधी याही प्रकृतीच्या कारणास्तव रॅलीस उपस्थित राहणार नाहीत. तसेच डाव्या पक्षांच्या नेत्यांनीही न जाण्याचा निर्णय घेतला आहे. असे असले तरी काँग्रेस पक्ष राज्यसभेतील विरोधी पक्षनेते गुलाम नबी आझाद यांना रॅलीस पाठविण्याची शक्यता आहे. या रॅलीस गांधी कुटुंबिय उपस्थित राहिले असते तर त्याचा मोठा फटका काँग्रेसला बसला असता.