भारतीय लष्कर बलात्कारी!: आझम खान

मटा ऑनलाइन वृत्त । नवी दिल्ली

चिथावणीखोर वक्तव्यांसाठी ओळखलेले समाजवादी पक्षाचे 'वजनदार' नेते व मुलायमसिंह यादव यांचे विश्वासू सहकारी आझम खान यांनी आता नव्या वादाला तोंड फोडलं आहे. आतापर्यंत केवळ राजकीय नेत्यांवर खालच्या थरावर जाऊन टीका करणाऱ्या आझम खान यांनी आता थेट भारतीय लष्करालाच लक्ष्य केलं असून जवानांवर बलात्काराचा आरोप केला आहे.

लष्कराला आरोपीच्या पिंजऱ्यात उभं करणाऱ्या आझम खान यांच्या त्या भाषणाचा व्हिडिओ समोर आला आहे. यात ते भारतीय जवानांवर थेट आरोप करताना दिसतात. 'दहशतवादी लष्करातील जवानांची गुप्तांगं कापून घेऊन गेले. त्यांनी असं का केलं, याचा विचार व्हायला हवा. 'त्यांना जवानांचे हात नको होते. मुंडकी नको होती आणि पायाशीही काही घेणंदेणं नव्हतं. शरीराच्या ज्या अवयवाबद्दल त्यांना तक्रार होती, तोच अवयव ते घेऊन गेले, असं आझम म्हणाले. 'हे कृत्य करून दहशतवाद्यांनी एक मेसेज दिला आहे. संपूर्ण देशाला याची लाज वाटली पाहिजे. आम्ही जगाला काय तोंड दाखवणार, याचा विचार करायला हवं,' अशी मल्लिनाथी आझम यांनी केली आहे.

आझम यांच्या या वक्तव्याप्रकरणी त्यांच्या पक्षानं हात झटकले आहेत. मात्र, भाजपसह इतर पक्षांनी आझम खान यांच्यासह समाजवादी पक्षावरही हल्लाबोल केला आहे. 'अशा नेत्यांवर बहिष्कार घालायला हवा, असं भाजपचे प्रवक्ते संबित पात्रा यांनी म्हटलं आहे. तर, समाजवादी पक्षच त्यांच्या नेत्यांना अशा वक्तव्यासाठी प्रोत्साहन देत असल्याचा आरोप भाजपचे नेते जीव्हीएल नरसिंह यांनी केला आहे.