उरी हल्ल्याचा बॉलिवूडमधूनही निषेध

मटा ऑनलाइन वृत्त । मुंबई

जम्मू-काश्मीरमधील उरी येथे झालेल्या दहशतवादी हल्ल्याचा बॉलिवडूनंही तीव्र शब्दांत निषेध केला आहे. 'भारत सरकारनं अशा हल्ल्यांविरोधात कठोर भूमिका घ्यावी,' अशी मागणी बॉलिवूडमधील कलाकारांनी केली आहे. बॉलिवूडमधील आघाडीचा अभिनेता शाहरुख खान, रितेश देशमुख, दिग्दर्शक शेखर कपूर यांच्यासह अनेक कलाकारांनी उरी हल्ल्यात शहीद झालेल्या जवानांच्या कुटुंबीयांबद्दल सहवेदना प्रकट केल्या आहेत.

काय म्हणतात सेलिब्रिटी...

शाहरुख खान : उरीतील हल्ल्याचं वृत्त ऐकून तीव्र दु:ख झालं. शहीद जवानांच्या कुटुंबीयांच्या दु:खात मी सहभागी आहे. हल्लेखोरांना लवकरात लवकर शिक्षा व्हायला हवी.

रणदीप हुडा: अत्यंत दु:खद घटना आहे. हिंसाचार करून कधीही शांतता मिळवता येणार नाही.

शेखर कपूर: स्वर्ग जळतोय. किती सुंदर ठिकाण आहे उरी. काश्मीरचं हृदय विदीर्ण झालंय.

मधुर भांडारकर: उरीच्या भ्याड हल्ल्याची बातमी ऐकून मनाला वेदना झाल्या. शहीद वीरांना माझा सलाम.

ईशा गुप्ता: आता हे थांबलंच पाहिजे. भारताना प्रत्युत्तर दिलंच पाहिजे. नरेंद्र मोदी.

अशोक पंडित: १७ जवान शहीद. आपल्या सैनिकांच्या जीवाचं मोल नसलेल्या माझ्या तथाकथित महान देशाच्या नपुंसकतेची मला लाज वाटते.

रितेश देशमुख : भारतमातेसाठी प्राणार्पण करणाऱ्या उरी हल्ल्यातील शहिदांच्या दु:खात मी सहभागी आहे.