अडवाणी, जोशींसह १३ जणांवर खटला चालवाः SC

मटा ऑनलाइन वृत्त । नवी दिल्ली

बाबरी मशीद प्रकरणी सुप्रीम कोर्टानं आज महत्त्वपूर्ण निकाल दिला आहे. भाजपचे ज्येष्ठ नेते लालकृष्ण अडवाणी, मुरली मनोहर जोशी, केंद्रीय मंत्री उमा भारती यांच्यासह १३ नेत्यांवर गुन्हेगारी कट रचल्याचा खटला चालवण्याचे निर्देश त्यांनी दिले आहेत. तत्कालीन मुख्यमंत्री कल्याण सिंह हे सध्या राजस्थानचं राज्यपालपद भूषवत असल्यानं त्यांच्यावर खटला चालवता येणार नसल्याचं कोर्टानं स्पष्ट केलंय.

त्याशिवाय, कारसेवकांविरोधात लखनौ न्यायालयात सुरू असलेले खटले आणि रायबरेली न्यायालयातील व्हीव्हीआयपींविरोधातील खटल्यांची लखनौ कोर्टातच एकत्रित सुनावणी घेऊन ते दोन वर्षांत निकाली काढण्याचे आदेशही न्यायमूर्ती पी सी घोष आणि आर. एफ. नरिमन यांच्या खंडपीठाने दिले.

अयोध्येतील बाबरी मशीद पाडल्याप्रकरणी लालकृष्ण अडवाणी, मुरली मनोहर जोशी, उमा भारती यांच्यासह भाजपच्या अन्य ज्येष्ठ नेत्यांवर गुन्हेगारी कट रचल्याचा आरोप पुन्हा ठेवण्याची मागणी सीबीआयनं सर्वोच्च न्यायालयाकडे केली होती. त्या संदर्भातील निकाल कोर्टानं ६ एप्रिलला राखून ठेवला होता. स्वाभाविकच, आजच्या सुनावणीकडे सगळ्यांचं लक्ष लागलं होतं.

याआधी, रायबरेली ट्रायल कोर्टानं अडवाणी, जोशी, उमा भारती यांच्यासह भाजप नेते कल्याण सिंह, शिवसेनाप्रमुख बाळासाहेब ठाकरे, विहिंप नेते गिरिराज किशोर, विनय कटियार आदींवरील कटाचा आरोप काढून टाकला होता. अलाहाबाद हायकोर्टानं २० मे २०१० रोजी या निकाल कायम ठेवला होता. परंतु, सुप्रीम कोर्टानं सीबीआयच्या बाजूने निकाल देत, अडवाणींसह १३ जणांवर पुन्हा खटला चालवण्यास संमती दिली आहे. अडवाणी आणि मुरली मनोहर जोशी यांची नावं राष्ट्रपतिपदाच्या निवडणुकीसाठी चर्चेत असतानाच हा निकाल आल्यानं भाजपसाठी तो धक्का मानला जातोय.
Babri Masjid Case: SC allowed CBI's appeal challenging withdrawal of conspiracy charges against Senior BJP leaders including L K Advani pic.twitter.com/DF6O2VgIRr — ANI (@ANI_news) April 19, 2017