वृत्तसंस्था, अलाहाबाद
कायद्याचे शिक्षण घेत असलेल्या एका तरुणीचे लैंगिक शोषण केल्याच्या आरोपाखाली अटकेत असलेला भाजप नेता व माजी केंद्रीय मंत्री स्वामी चिन्मयानंद याला अलाहाबाद उच्च न्यायालयाने सोमवारी अखेर जामीन मंजूर केला. या प्रकरणात चिन्मयानंद व संबंधित तरुणी यापैकी कोणी कोणाचे शोषण केले हे ठरवणे कठीण असून या दोघांनीही एकमेकांचा वापर करून घेतला, असे निरीक्षण न्यायालयाने नोंदवले. चिन्मयानंदला जामीन मंजूर करताना न्यायालयाने हा खटला लखनऊ येथील स्थानिक न्यायालयाकडे वर्ग केला. या खटल्याचे कामकाज चिन्मयानंदच्या शहाजहानपूर या मूळ शहरात चालवले गेल्यास त्याच्याकडून साक्षीपुराव्यांबाबत हस्तक्षेप करण्यात येईल, असा आक्षेप या तरुणीने घेतला होता. चिन्मयानंदकडून पाच कोटी रुपयांची खंडणी उकळू पाहणाऱ्या या तरुणीलाही पोलिसांनी यापूर्वीच अटक केली होती. तिला ४ डिसेंबरला जामीन देण्यात आला.