अमिताभ यांचा आवाज, छायाचित्रे वापरण्यास मनाई; दिल्ली उच्च न्यायालयाचा आदेश

नवी दिल्ली : बॉलिवूडचे शहनशाह अभिनेते अमिताभ बच्चन यांचा आवाज, छायाचित्रे आदींच्या बेकायदा वापरावर बंदी घालणारा अंतरिम आदेश शुक्रवारी दिल्ली उच्च न्यायालयाने दिला. अमिताभ बच्चन यांनी 'केबीसी लॉटरी' चालवणाऱ्यांसह अनेक लोकांवर 'एक सेलिब्रिटी व्यक्तिमत्व म्हणून प्रसिद्धीच्या अधिकाराचे' उल्लंघन केल्याचा आरोप करणारी याचिका दाखल केली होती.

अमिताभ बच्चन हे प्रसिद्ध रिअॅलिटी शो 'कौन बनेगा करोडपती'चे (केबीसी) सूत्रसंचालक आहेत. या याचिकेवर सुनावणी करताना न्या. नवीन चावला म्हणाले की, बच्चन हे लोकप्रिय व्यक्तिमत्त्व आहे, यात शंका नाही आणि या टप्प्यावर त्यांना दिलासा न मिळाल्यास त्यांचे कधीही भरून न येणारे नुकसान आणि बदनामी होऊ शकते. बच्चन यांच्या अधिकारांचे उल्लंघन करणाऱ्या वेबसाइट्सवर कारवाई करण्याचे निर्देशही न्यायालयाने यावेळी दूरसंचार अधिकाऱ्यांना दिले. दूरसंचार सेवा प्रदात्यांनाही असे संदेश प्रसारित करणारे दूरध्वनी क्रमांक 'ब्लॉक' करण्याचे निर्देशही देण्यात आले होते.

वरिष्ठ अधिवक्ता हरीश साळवे म्हणाले की, याचिका केवळ खटल्यात नाव असलेल्यांपुरतीच मर्यादित नाही, तर बच्चन यांच्या प्रसिद्धी हक्कांचे उल्लंघन करणाऱ्या ज्ञात किंवा अज्ञात पक्षांविरुद्धही आहे. लॉटरीशिवाय इतरही अनेक कामे त्यांच्या नावावर सुरू असल्याचे त्यांनी सांगितले. त्यांचे छायाचित्र असलेले टी-शर्टही विकले जात आहेत, असेही त्यांनी सांगितले.