आईच्या अंत्यसंस्कारानंतर भावुक मुलांची नदीत उडी; वाचवण्यासाठी दोन नातू झेपावले, बेपत्ता

उन्नाव: उत्तर प्रदेशच्या उन्नावमधील नानामऊ घाटावर एकच खळबळ उडाली. आईवर अंत्यसंस्कार करण्यासाठी आलेल्या मुलानं गंगा नदीत उडी घेतली. तो बुडू लागत असल्याचं पाहून त्याला वाचवण्यासाठी मोठा भाऊ मिंटूनं पाण्यात उडी मारली. त्यानंतर दोघे बुडू लागले. त्यांना पाहून लहान भाऊ कमलेशच्या दोन्ही मुलांनी उड्या घेतल्या. पाणबुड्यांनी कमलेश आणि त्यांच्या भावाला सुरक्षित बाहेर काढलं. पण कमलेश यांच्या दोन्ही मुलांचा शोध अद्याप लागलेला नाही.

बेहटा मुजावर पोलीस ठाण्याच्या हद्दीत असलेल्या रुरी सादिकपूर गावातील राजा पासी यांच्या पत्नीचं निधन झालं. नानामऊ घाटावर अंत्यसंस्कारासाठी कुटुंबीय, नातेवाईक जमले. याच दरम्यान महिलेचा लहान मुलगा कमलेशनं गंगा नदीत उडी मारली. तो बुडू लागला. त्याला वाचवण्यासाठी त्याचा मोठा भाऊ मिंटू नदीत झेपावला. नदी खोल असल्यानं दोघे बुडू लागले.
दुर्गेच्या मंडपात नेण्यास पतीचा नकार; पत्नीनं लेकीला संपवलं, नंतर टोकाचं पाऊल उचललं
काका आणि वडील बुडत असल्याचं पाहून घाटावर उभे असलेले कमलेश यांचे मुलगे, आकाश आणि राकेश यांनी पाण्यात उड्या घेतल्या. नदीच्या पाण्याच्या प्रवाहाचा वेग जास्त होता. त्यामुळे ते वाहून गेले. घटनेची माहिती मिळताच पोलीस पोहोचले. पाणबुड्यांच्या मदतीनं मिंटू आणि कमलेश यांना सुरक्षित बाहेर काढण्यात आले. कमलेश यांच्या मुलांचा शोध सुरू आहे. अनेक तास त्यांचा शोध घेतल्यानंतरही त्यांचा शोध लागलेला नाही.
फूड व्हॅनच्या उद्घाटनाची लगबग; त्याच फूड व्हॅनमध्ये अनर्थ घडला; जिम ट्रेनरचा करुण अंत
बांगरमाऊ पोलीस ठाण्याच्या हद्दीत राहणाऱ्या एका व्यक्तीच्या आईचा मृत्यू झाला. घरातील सर्वजण अंत्यसंस्कारासाठी गेले होते. नानामऊ घाटावर अंत्यसंस्कार झाले. त्यावेळी महिलेच्या एका मुलानं पाण्यात उडी घेतली. त्याला वाचवण्यासाठी त्याचा भाऊ नदीत झेपावला, अशी माहिती एएसपी शशी शेखर सिंह यांनी दिली. दोघांना वाचवण्यासाठी त्यांच्याच कुटुंबातील सख्ख्या भावांनी उड्या मारल्या. त्यांचा शोध अद्याप लागलेला नाही. त्यांचा शोध सुरू आहे, असं सिंह यांनी सांगितलं.