रसगुल्ल्याच्या ‘जीआय’साठी ओडिशाच्या हालचाली

वृत्तसंस्था, भुवनेश्वर

ओडिशा रसगुल्ल्याला भौगोलिक संकेतांक (जीआय टॅग) मिळण्यासाठी सरकारकडून ऑगस्टच्या पहिल्या आठवड्यात सर्व माहिती विस्तृत स्वरूपात सादर करण्यात येणार असल्याचे ओडिशा सरकारने म्हटले आहे. बंगाली मिठाई म्हणून प्रसिद्ध असलेल्या रसगुल्ल्यावर ओडिशानेही दावा केल्याने रसगुल्ल्याच्या भौगोलिक हक्कावरून निर्माण झालेला वाद पश्चिम बंगालला भौगोलिक संकेतांक (जीआय टॅग) मिळाल्याने मिटला होता; परंतु रसगुल्ला हा ओडिशाचाच पदार्थ असल्याचे सांगत ओडिशा सरकारकडून भौगोलिक संकेतांक कार्यालयाला माहिती पाठविण्यात येणार आहे.

'पेटंट, डिझाइन आणि ट्रेडमार्क कंट्रोलर जनरल यांच्याकडून आम्हाला एक पत्र मिळाले आहे. त्यामध्ये रसगुल्ल्याला 'जीआय टॅग' देण्याबाबत १४ प्रश्नांची सविस्तर उत्तरे मागविण्यात आली आहेत. त्यानुसार ऑगस्टच्या पहिल्या आठवड्यात सर्व माहिती सादर करण्यात येणार आहे,' असे ओडिशाचे लघु व मध्यम उद्योग मंत्री प्रफुल्ल सामल यांनी सांगितले, तर 'जीआय' कार्यालयाने मागितलेल्या काही प्रश्नांची विस्तृत माहिती पाठविण्यात आली असून, उर्वरित माहितीही लवकरच पाठवू, असे अर्थमंत्री एस. बी. बेहरा यांनी म्हटले आहे.

रसगुल्ला पदार्थावरून पश्चिम बंगाल व ओडिशा यांच्यात सुरू असलेल्या वादात पश्चिम बंगालने 'जीआय टॅग' मिळवून बाजी मारली आहे; परंतु ओडिशाने चेन्नईस्थित 'जीआय' कार्यालयाकडे रसगुल्ल्याचे मूळ ओडिशात असल्याचे काही दाखले देऊन 'ओडिशा रसगुल्ला'साठी 'जीआय टॅग' मिळण्याची मागणी केली आहे. ओडिशात रसगुल्ला दिनही साजरा केला जात असून, या दिवशी एकमेकांना रसगुल्ला दिले जाते; तसेच जगन्नाथ यात्रेदरम्यान भाविकांकडून रसगुल्ला अर्पण केले जातात.