गोमांस वाहतूक; दोघांच्या तोंडात शेण कोंबले

मटा ऑनलाइन वृत्त । मानेसर (हरयाणा)

गोमांसाची वाहतूक करणाऱ्या दोन जणांना पकडून गोरक्षक दलाच्या कार्यकर्त्यांनी 'शुद्धीकरणा'च्या नावाखाली त्यांच्या तोंडात शेण कोंबल्याची धक्कादायक घटना घडल्याने हरयाणा पुन्हा एकदा चर्चेत आलं आहे. गोरक्षक दलाची ही गुंडगिरी कॅमेऱ्यात कैद झाली असून हा व्हिडिओ सर्वत्र व्हायरल झाला आहे.

हरयाणातील कुंडली-मानेसर-पलवल हायवेवर १० जून रोजी ही घटना घडली. मात्र, त्याबाबत गुप्तता बाळगण्यात आली होती. आता या घटनेचा व्हिडिओ समोर आल्यानंतर मोठं वादळ उठलं आहे.

मिळालेल्या माहितीनुसार, गोमांस घेऊन चाललेला एक टेम्पो गोरक्षक दलाच्या कार्यकर्त्यांनी अडवला. त्यानंतर टेम्पोतील रिझवान आणि मुख्तयार या दोघांना खाली उतरवून बेदम मारहाण करण्यात आली. तिथेच हा प्रकार थांबला नाही. शेण, गोमूत्र, दही, तूप याचं मिश्रण असलेलं पंचगाव्य या दोघांना जबरदस्ती भरवण्यात आले. मुख्य म्हणजे गोरक्ष दलाचा गुडगाव येथील प्रमुख पदधिकारी धर्मेद्र यादव यानेच याबाबत कबुली दिली आहे. सात किलोमीटर पाठलाग करून बदरपूर सीमेजवळ हा टेम्पो पकडण्यात आला आणि टेम्पोत ७०० किलो गोमांस आढळले, असा यादवचा दावा आहे.

दरम्यान, हरयाणा सरकारने राज्यात गोमांस विक्रीवर बंदी घातलेली असली तरी गोरक्षक दलाच्या कार्यकर्त्यांना कायदा हातात घेण्याचा अधिकार कुणी दिला, असा सवाल विचारला जात आहे.