'मिस व्हीलचेअर वर्ल्ड' : भारतातून राजलक्ष्मी

मटा ऑनलाइन वृत्त । बेंगळुरू

गेल्या काही वर्षांत भारतीय सुंदरींनी जगावर अधिराज्य गाजवले आहे. यात आता कदाचित आणखी एका विश्वसुंदरीची भर पडू शकते. बेंगळुरूची राजलक्ष्मी पोलंडमध्ये होणाऱ्या 'मिस व्हीलचेअर वर्ल्ड' मध्ये भारताचे प्रतिनिधीत्व करत आहे. ३१ वर्षीय राजलक्ष्मी व्यवसायाने डेंटिस्ट आहे. २०१४ मध्ये तिने 'मिस व्हीलचेअर इंडिया'चा किताब जिंकला होता.

बीडीएसची परीक्षा पूर्ण केल्यानंतर २००७ मध्ये चेन्नईत एका राष्ट्रीय परीषदेत संशोधन प्रकल्प सादर करायला जात असताना राजलक्ष्मीच्या गाडीला अपघात झाला. यात तिच्या मणक्याला दुखापत होऊन तिच्या पायाला अर्धांगवायू झाला. या घटनेचा जबर धक्का तिला बसला. पण त्यातून बाहेर येत तिने मानसशास्त्र आणि फॅशनमधली आपली आवड जोपासली. तिला मिस व्हीलचेअर स्पर्धेबद्दल कळलं तेव्हा तिने त्यात सहभागी होण्याचा निर्णय घेतला. २०१४ साली तिचं हे स्वप्न पूर्ण झालं. आता लवकरच ती या स्पर्धेच्या निमित्ताने जग जिंकायला निघणार आहे.




आपला डॉक्टरकीचा पेशा सांभाळताना ती शाळांमध्ये मोफत दंत तपासणी शिबीरं घेते. ती व्हीलचेअर ट्रेनिंगही देते. तिने व्हीलचेअर बास्केटबॉल आणि व्हीलचेअर डान्समध्येही सहभाग घेतला आहे.