आक्रोश दिनाला देशभरात संमिश्र प्रतिसाद

मटा ऑनलाइन वृत्त । नवी दिल्ली/मुंबई

केंद्र सरकारच्या नोटाबंदीच्या निर्णयाविरोधात आज विरोधी पक्ष संसदेपासून रस्त्यापर्यंत विरोध दर्शवण्यासाठी सरसावले आहेत. देशभर जन आक्रोश दिन पुकारला असून ठिकठिकाणी विरोधी पक्षांचे कार्यकर्ते ​ 'आक्रोश' करायला रस्त्यावर उतरले आहेत. मुंबईसह राज्यात अनेक ठिकाणी आक्रोश दिनाला प्रतिसाद मिळत आहे. मुंबईत रस्त्यांवर वाहतूक कमी आहे. दरम्यान, जनता दल युनायटेड आणि तृणमूल काँग्रेस हे पक्ष या जन आक्रोश दिवसात सहभागी झालेले नाहीत.

काँग्रेससह आम आदमी पार्टी, बहुजन समाज पक्ष, समाजवादी पक्ष या आंदोलनात सहभागी झाले आहेत. सकाळी बिहारमध्ये दरभंगा येथे कम्युनिस्ट पक्षाच्या कार्यकर्त्यांनी रेल रोको आंदोलन केले तर अलाहाबाद येथे समाजवादी पक्षाच्या कार्यकर्त्यांनी आंदोलन केले. बिहारमध्ये सीपीआय, सीपीआय(एम), सीपीआय (एमएल) समर्थकांनी मोठ्या प्रमाणावर रेल्वे रोखून निषेध केला. पाटणा, गया, जहानाबाद, भागलपूर आणि मुझफ्फरपूर रेल्वे स्टेशनवर अनेक गाड्या रोखण्यात आल्या. पाटणा-रांची जनशताब्दी एक्स्प्रेस तारेगण रेल्वे स्थानकात रोखण्यात आली.

सर्वपक्षीय शिष्टमंडळास पंतप्रधानांनी भेट नाकारल्याने केरळमध्ये डाव्या आघाडीने १२ तासांचा संप पुकारला आहे. तिरुवनंतपुरममध्ये कडकडीत बंद पाळण्यात आला आहे. तिकडे कोलकात्यात मात्र आंदोलनाचा कोणताही परिणाण जाणवलेला नाही.

भाजपचा जन आधार दिवस!

राज्यात अहमदनगर येथे युवक काँग्रेसचे प्रदेश उपाध्यक्ष सत्यजीत तांबे यांच्या नेतृत्वाखाली काँग्रेसने आंदोलन केले. नागपुरात भाजप विरोधकांच्या 'आक्रोश दिना'ला उत्तर म्हणून 'जन आधार दिवस'
साजरा करत आहे. भाजप कार्यकर्ते मिठाई आणि फुले वाटताना दिसत आहेत.