बिहारमध्ये राजकीय भूकंप; नीतीश कुमारांचा राजीनामा

मटा ऑनलाइन वृत्त। पटना

बिहार राज्यात मोठा राजकीय भूकंप झाला असून बिहारचे मुख्यमंत्री नीतीश कुमार यांनी राज्यपाल केशरीनाथ त्रिपाठी यांच्याकडे आपला राजीनामा दिला आहे. याचाच अर्थ बिहारमध्ये महाआघाडी छिन्नविछिन्न झाली आहे. भाजपविरुद्ध विरोधकांच्या एकतेला हा मोठा धक्का असल्याचे बोलले जात आहे.

आज संध्याकाळी अचानकपणे बिहारमध्ये नाट्यमय घडामोडींना वेग येऊ लागला. दुपारी पार पडलेल्या आरजेडीच्या बैठकीनंतर लालू प्रसाद आणि तेजस्वी यादव यांनी बिहारमधीस महाआघाडीला कोणताही धोका नसल्याचे जाहीर केले होते. आपली नीतीश कुमार यांच्याशी चर्चा सुरू असून त्यांनी कधीही तेजस्वी यांचा राजीनामा मागितलेला नाही असेही लालू प्रसाद यादव यांनी जाहीर केले होते. मात्र काही तासांतच हे चित्र पूर्णपणे बदलून गेले.

आरजेडीची बैठक संपल्यानंतर संध्याकाळी ५ वाजता जेडीयूची बैठक सुरू झाली. ही बैठक संपताच नीतीश कुमार यांनी राज्यपालांना भेटण्याचा निर्णय घेतला. सूत्रांनी दिलेल्या माहितीनुसार, आता मोठा निर्णय घेण्याची वेळ आली आहे असे विधिमंडळ पक्षाच्या बैठकीत नीतीश कुमार यांनी स्पष्ट केले होते.