उत्तर प्रदेशात भाजपच्या यादीतून मुस्लिम गायब

मटा ऑनलाइन वृत्त । लखनऊ

'सबका साथ सबका विकास' म्हणत सत्तेवर आलेल्या भाजपनं देशातील सर्वात मोठे राज्य असलेल्या उत्तर प्रदेश विधानसभा निवडणुकीसाठी १४९ उमेदवारांची पहिली यादी जाहीर केली आहे. या यादीत ठाकूर, गुर्जर, ब्राह्मण आणि जाट समाजातील उमेदवारांनाही तिकीट देण्यात आलं आहे. पण या १४९ उमेदवारांच्या यादीत एकाही मुस्लिम धर्मियांना तिकीट देण्यात आलं नसल्यानं आश्चर्य व्यक्त केलं जात आहे.

'द इंडियन एक्सप्रेस'ने दिलेल्या वृत्तानुसार भाजपनं सोमवारी १४९ उमेदवारांची यादी जाहीर केली. त्यात ठाकूर समाजातील २६ उमेदवारांना तिकीटे देण्यात आली आहेत. त्याशिवाय ब्राह्मण समाजातील १५ उमेदवारांना तिकीट देण्यात आलं आहे. जाट, गुर्जर, लोध या ओबीसी जातीत मोडणाऱ्या ५६ उमेदवारांनाही तिकीट देण्यात आलं आहे. एवढेच नव्हे तर अल्पसंख्यांकांचंही उत्तर प्रदेश विधानसभेत प्रतिनिधीत्व असावं म्हणून शीख समुदायातील एकाला तिकीट देण्यात आलं आहे. शिवाय खुल्या प्रवर्गातील ४५ उमेदवारांना तिकीटे देण्यात आली आहेत. पण मुस्लिम समाजातील एकाही व्यक्तिला तिकीट देण्यात आलेलं नाही.

भाजपनं तिकीट वाटप करताना घराणेशाहीचीही काळजी घेतल्याचं या यादीतून दिसतयं. उत्तर प्रदेशचे माजी मुख्यमंत्री आणि राजस्थानचे राज्यपाल कल्याण सिंह यांचे नातू संदीप यांना अतरौली विधानसभा मतदारसंघातून तिकीट देण्यात आलं आहे. संदीपचे वडिल राजवीर सिंह हे भाजपचे खासदार आहेत. भाजपनं दुसऱ्या पक्षातून आलेल्या आयारामानांही उमेदवारी दिली आहे.