मध्य प्रदेशात आज विश्वासमत
वृत्तसंस्था, भोपाळ
मध्य प्रदेशचे राज्यपाल लालजी टंडन यांच्या आदेशानुसार सोमवारी विधानसभेत हात उंचावून बहुमत चाचणी घेण्यात यावी, अशी मागणी भाजपने केली आहे. 'विधानसभेच्या सभागृहातील इलेक्ट्रॉनिक मतदान यंत्रणा काम करत नसल्यामुळे हात उंचावून मतदान घेण्यात यावे,' अशी मागणी विधानसभेतील विरोधी पक्ष नेते गोपाल भार्गव यांनी केली.
राज्यातील काँग्रेसच्या २२ आमदारांनी राजीनामा दिल्याने राज्यपालांनी मुख्यमंत्री कमलनाथ यांना १६ मार्च रोजी विश्वासमत घेण्याचे निर्देश शनिवारी रात्री उशिरा दिले होते. राजीनामा दिलेल्यांपैकी सहा मंत्र्यांचे राजीनामे विधानसभा अध्यक्षांनी स्वीकारले आहेत.
या घडामोडी घडत असतानाच, गेले काही दिवस जयपूरमध्ये तळ ठोकून असलेले काँग्रेसचे आमदार रविवारी भोपाळला परतले. तर, राजीनामा दिलेले व सध्या बेंगळुरूत असलेले काँग्रेसचे आमदार रविवारी रात्री किंवा सोमवारी पहाटे भोपाळला परततील. काँग्रेसला सोडचिठ्ठी देऊन भाजपवासी झालेले ज्योतिरादित्य शिंदे हे देखील रविवारी रात्री किंवा सोमवारी सकाळी भोपाळमध्ये दाखल होतील, असे सांगण्यात आले.
करोना पथ्यावर?
विधिमंडळाचे अधिवेशन आज, सोमवारी प्रस्तावित असले तरी मुळात करोनाच्या पार्श्वभूमीवर ते होते की नाही, याबाबतही तर्कवितर्क सुरू आहेत. विधिमंडळ अधिवेशन न झाल्यास ते कमलनाथ यांच्या पथ्यावरच पडेल, असे बोलले जाते. बाहेरील राज्यांत जे आमदार मुक्कामी होते त्यांची करोना चाचणी घेण्यात यावी, अशीही मागणी करण्यात येत आहे.