यूपीतही भाजप करणार धक्कातंत्राचा प्रयोग? पराभूत उमेदवार उपमुख्यमंत्री होण्याची शक्यता

लखनऊ: विधानसभा निवडणुकीत पराभव झाल्यानंतरही भारतीय जनता पक्षानं पुष्करसिंह धामी यांनाच मुख्यमंत्रिपदी बसवण्याचा निर्णय घेतला आहे. अशाच प्रकारचा निर्णय भाजपकडून उत्तर प्रदेशातही घेतला जाण्याची शक्यता आहे. माजी उपमुख्यमंत्री केशवप्रसाद मौर्य यांना योगी आदित्यनाथ यांच्या मंत्रिमंडळात पुन्हा एकदा उपमुख्यमंत्री म्हणून संधी दिली जाण्याची शक्यता आहे.

वाचा: पुष्करसिंह धामीच पुन्हा उत्तराखंडचे मुख्यमंत्री; पराभव झाला तरीही...

भाजपचे ज्येष्ठ नेते असलेले केशवप्रसाद मौर्य हे योगींच्या सरकारमध्ये उपमुख्यमंत्री होते. सिराथू मतदारसंघातून त्यांनी विधानसभा निवडणूक लढवली होती. अपना दलच्या उमेदवार पल्लवी पटेल यांच्याकडून त्यांना पराभव पत्करावा लागला. मौर्य यांचं नाव मुख्यमंत्रिपदाच्या शर्यतीतही आघाडीवर होतं. त्यामुळं मौर्य यांच्याबरोबरच यूपी भाजपसाठी हा मोठा धक्का होता. योगी आदित्यनाथ व केशवप्रसाद मौर्य यांच्यात फारसे सख्य नव्हते. त्यांच्यात अनेक मुद्द्यांवर मतभेद होते. मौर्य यांच्या पराभवामुळं योगींचा एक प्रतिस्पर्धी आपोआपच कमी झाल्याचंही बोललं जात होतं. मात्र, उत्तराखंडमधील घडामोडींनंतर पुन्हा एकदा राजकीय समीकरणं बदलली आहेत. मौर्य यांना पुन्हा एकदा उपमुख्यमंत्रिपद दिलं जाण्याची शक्यता व्यक्त होत आहे.

बेबीरानी मौर्य होणार उपमुख्यमंत्री?

उत्तराखंडच्या राज्यपालपदाचा राजीनामा देऊन विधानसभा निवडणूक लढणाऱ्या बेबीरानी मौर्य यांनाही उपमुख्यमंत्रिपदी संधी मिळण्याची शक्यता आहे. बेबीरानी मौर्य या जाटव समाजातील आहेत. यूपीच्या निवडणुकीत जाटव समाज मोठ्या संख्येनं भाजपच्या मागे उभा राहिल्याचं बोललं जात होतं. त्याचबरोबर, महिलांनीही भाजपला चांगला पाठिंबा दिला होता. बेबीरानी यांना उपमुख्यमंत्रिपदी संधी दिल्यास या दोन्ही वर्गांना न्याय दिल्यासारखं होणार आहे.

दिनेश शर्मा यांचं उपमुख्यमंत्रिपद जाणार?

उत्तर प्रदेश भाजपचे प्रदेशाध्यक्ष स्वतंत्रदेव सिंह यांना देखील योगी मंत्रिमंडळामध्ये संधी मिळण्याची शक्यता आहे. तसं झाल्यास त्यांच्या जागी मागी सरकारमधील उपमुख्यमंत्री दिनेश शर्मा यांना नियुक्त केले जाईल, अशी चर्चा आहे. भाजपवर नाराज असलेल्या ब्राह्मण वर्गाला आपलंसं करण्यासाठी ही खेळी खेळली जाऊ शकते, असंही बोललं जात आहे.